काठमाडौं । चालु आर्थिक वर्ष २०८०/८१ को पहिलो त्रैमासमा नबिल बैंकको नाफा घटेको छ । बैंकले शुक्रबार सार्वजनिक गरेको चालु आर्थिक वर्षको पहिलो त्रैमासको वित्तीय विवरण अनुसार गत आर्थिक वर्ष २०७९/८० को पहिलो त्रैमासको तुलनामा नाफा ६.५० प्रतिशतले घटेको हो ।
चालु आर्थिक वर्षको पहिलो त्रैमासमा गत आर्थिक वर्षको सोही अवधिको तुलनामा नाफा १० करोड २२ लाख रुपैयाँले कमी आएको वित्तीय विवरणमा देखिन्छ । चालु आर्थिक वर्षको पहिलो त्रैमासमा एक अर्ब ४६ करोड ९३ लाख रुपैयाँ नाफा आर्जन गरेको बैंकले गत वर्षको सोही अवधिमा एक अर्ब ५७ करोड १५ लाख रुपैयाँ नाफा गरेको थियो ।
बैंकले तीन महिनामा चार अर्ब १७ करोड ३९ लाख रुपैयाँ खुद ब्याज आम्दानी गरेको छ । गत वर्ष बैंकले खुद ब्याज आम्दानी बापत तीन अर्ब ६७ करोड ७१ लाख रुपैयाँ खुद ब्याज आम्दानी गरेको थियो ।
बैंकले सञ्चालन नाफामार्फत दुई अर्ब १२ करोड ६१ लाख रुपैयाँ आर्जन गरेको छ । बैंकले गत वर्ष सञ्चालन मुनाफामार्फत दुई अर्ब २३ करोड चार लाख रुपैयाँ आर्जन गरेको थियो ।
बैंकको खराब कर्जा भने पहिलो त्रैमासमा बढेर ३.६९ प्रतिशत पुगेको छ । गत वर्ष यस्तो कर्जा २.३३ प्रतिशत थियो ।
बैंकको चुक्तापुँजी २७ अर्ब पाँच करोड ६९ लाख ९७ हजार रुपैयाँ कायम छ । बैंकको जगेडा कोषमा २८ अर्ब ३९ करोड रुपैयाँ कायम छ । गत वर्षको असोज मसान्तसम्म जगेडामा २७ अर्ब सात करोड सात लाख रुपैयाँ थियो ।
बैंकले पुस मसान्तसम्म तीन खर्ब ५३ अर्ब ५६ करोड रुपैयाँ ऋण लगानी गरेको छ । चार खर्ब १४ अर्ब ८५ करोड रुपैयाँ कर्जा संकलन गरेको छ ।
बैंकको गत वर्षको तुलनामा ब्याजको स्प्रेड रेट भने घटेको छ । गत वर्षको असोज मसान्तसम्म स्प्रेड रेट ४.०३ प्रतिशत थियो भने चालु आर्थिक वर्षको सोही अवधिमा यस्तो स्प्रेड रेट ३.९९ प्रतिशतमा झरेको छ ।
