काठमाडौं । ओपनर क्विन्टन डी कक र रसी भान डेर डुसेनको शतकप्रेरित दक्षिण अफ्रिकाले आईसीसी एकदिवसीय विश्वकपमा साविक उपविजेता न्युजिल्यान्डविरुद्ध ३५८ रनको लक्ष्य प्रस्तुत गरेको छ ।

बुधबार भारतको पुनेस्थित महाराष्ट्र क्रिकेट रंगशालामा जारी खेलमा टस हारेर ब्याटिङमा आएको दक्षिण अफ्रिकाले निर्धारित ५० ओभरमा चार विकेट गुमाएर ३५७ रनको योगफल खडा गर्‍यो ।

दक्षिण अफ्रिकाका रसी भान डेर डुसेनले १३३ रन बनाए । उनले ११८ बलमा नौ चौका र पाँच छक्का प्रहार गरे । उनले दोस्रो विकेटका लागि ओपनर क्विन्टन डी ककसँग २०० रनको साझेदारी गर्दै दक्षिण अफ्रिकाको बलियो आधार खडा गरेका थिए । डी ककले ११६ बलमा १० चौका र तीन छक्कासहित ११४ रन बनाए । 

यसबाहेक, डेविड मिलरले ५३, कप्तान टेम्बा बवुमाले २४ हेन्रिक क्लासेनले १० रन थपे । न्युजिल्यान्डका टिम साउदीले दुई विकेट लिए । टे«न्ट बोल्ड र म्याट हेनरीले समान एक विकेट लिए ।

विश्वकपमा एक खेलमा मात्र हार बेहोरेको दक्षिण अफ्रिका दोस्रो स्थानमा छ । दक्षिण अफ्रिकाले ६ खेलबाट १० अंक जोडेको छ । समान खेलबाट आठ अंक जोडेको न्युजिल्यान्ड तालिकाको तेस्रो स्थानमा छ ।