काठमाडौं । भारतमा जारी आईसीसी एकदिवसीय विश्वकपमा पाकिस्तानले लगातार चार खेलमा हार व्यहो¥यो । मंगलबार बंगालदेशविरुद्ध भने सात विकेटको सहज जित निकाल्यो । 

विश्व क्रिकेटमा आफ्नो चीर–प्रतिद्वन्दीविरुद्ध खेलिरहेको पाकिस्तानले सात खेलमध्ये निकालेको यो तेस्रो जित हो ।

लगातारको हारले पाकिस्तानी टिम र मुख्यतः कप्तान बाबर आजमलाई चर्को दबाब थपिएको छ । केही पाकिस्तानी क्रिकेट विश्लेषकले त सार्वजनिक रूपमै कप्तान आजमलाई ‘असफल’ बताइसकेका छन् ।

हुन् त आजमको यस विश्वकप प्रदर्शनले पनि उनीहरूको धारणालाई मलजल गरिरहेको छ । जारी विश्वकपमा आजमले सात खेल खेल्दा २१६ रनमात्र बनाएका छन् । हाल विश्वकपमा शतकविहीन आजमको औषत ३०.८५ को मात्र छ ।

यो तथ्यांकले पाकिस्तानको लगातार हारमा आजमको प्रदर्शन पनि जिम्मेवार छ भन्ने देखाउँछ । तर, पाकिस्तानी टिमको खराब लयको जिम्मेवारी आजमलाई मात्र दिन भने पक्कै मिल्दैन । जे होस्, पाकिस्तानी टिम यस विश्वकपमा स्वभाविक लयका निम्ति संघर्षरत छ । 

सात खेल खेल्दा तीन जितसहित तालिकाको पाँचौँ स्थानमा रहेको पाकिस्तानको सेमिफाइनल सम्भावना अनिश्चित छ । तर, असम्भव भने छैन । लगातार चार हारपछि मंगलबारको जितले आजमको कप्तानीमा रहेको यो टिमलाई केही राहत मिलेको छ ।

बंगलादेशले दिएको २०५ रनको लक्ष्य ३२.३ ओभरमा भेट्टाएका कारण यो जितले पाकिस्तानी टिमका नेट रनरेटमा पनि सकारात्मक सुधार ल्याएको छ । 

कसरी सेमिफाइनल पुग्न सक्छ पाकिस्तान ?
पाकिस्तानी टिमलाई सेमिफाइनल सम्भावना कायम राख्न सबैभन्दा पहिले बाँकी रहेका दुई खेलमा जितको आवश्यकता छ । पाकिस्तानले अझै पनि साविक विजेता इंग्ल्यान्ड र साविक उपविजेता न्युजिल्यान्डविरुद्ध खेल्न बाँकी नै छ । 

आगामी दुई खेलमा जित निकाले पाकिस्तान सेमिफाइनलको दौडमा कायम रहने छ । तर, आजमको टिम अन्य टोलीको नतिजा निर्भर रहनेछ । यसैकारण पाकिस्तानको सेमिफाइनल सम्भावना कठिन छ । अन्य टिमको नतिजा अनुकूल नआए पाकिस्तानको यो विश्वकप यात्रा लिग चरणमै समाप्त हुनेछ । 

पाकिस्तान अन्तिम चारमा प्रवेश गर्नका लागि अस्ट्रेलिया वा दक्षिण अफ्रिकाले अफगानिस्तानलाई हराउनु पर्नेछ । यस्तै, दक्षिण अफ्रिका वा श्रीलंकाले न्युजिल्यान्डविरुद्ध जित निकाल्नु पर्नेछ । यसबाहेक, पाकिस्तानले सेमिफाइनल यात्रा सुनिश्चित गर्न भारतले अबको तीनै खेलमा जित निकाल्न आवश्यक छ । 

जारी विश्वकपमा अपराजित भारतले अब श्रीलंका, दक्षिण अफ्रिका र नेदरल्यान्ड्ससँग खेल्न बाँकी छ ।

अंक तालिका 
विश्वकपमा अपराजित भारत ६ खेलबाट १२ अंकसहित शीर्ष स्थानमा छ । दोस्रो स्थानमा रहेको दक्षिण अफ्रिकाले ६ खेलबाट १० अंक जोडेको छ । समान खेलबाट आठ अंक जोडेर न्युजिल्यान्ड र अस्ट्रेलिया क्रमशः तेस्रो र चौथो स्थानमा छन् ।

छैटौँ स्थानको अफगानिस्तानले ६ खेलबाट ६ अंक जोडेको छ । श्रीलंका र नेदरल्यान्ड्स समान ६ खेलबाट चार अंकसहित क्रमशः सातौँ र आठौँ स्थानमा छन् । सात खेलबाट दुई अंक जोडेको बंगलादेश तालिकाको नवौँ र ६ खेलबाट दुई अंक जोडेको इंग्ल्यान्ड तालिकाको पुछारमा छ ।