काठमाडौं । नेपाल भ्रमणमा रहेका संयुक्त राष्ट्रसंघका महासचिव एन्टोनियो गुटेरेसले नेपालले द्वन्द्वको आँधीलाई सफलतापूर्वक शान्त पारेको बताएका छन् । मंगलबार संसद्को दुवै सदनलाई एकसाथ सम्बोधन गर्दै उनले उक्त कुरा बताएका हुन् ।
“तपाईँको देशले द्वन्द्वको आँधीलाई सफलतापूर्वक शान्त पारेको छ । र, युद्धबाट शान्तितर्फ उन्मुख भएको छ,” महासचिव गुटेरेसले भने, “यसमा सहयोग गर्न पाउँदा संयुक्त राष्ट्रसंघ गर्व गर्छ ।”
नेपालले शान्ति प्रक्रियालाई टुङ्ग्याउन लागेकोमा उनले खुसी व्यक्त गरे । “तपाईँहरु शान्ति प्रक्रियालाई टुङ्गोमा पुर्याउन अन्तिम चरणको तयारी गर्दै हुनुहुन्छ । संक्रमणकालीन न्यायको माध्यमबाट युद्धको घाउ निको पार्दै हुनुहुन्छ,” उनले भने ।
संक्रमणकालीन न्याय प्रक्रियाले पीडित, परिवार र समुदायको पीडामा मलम लगाउने भनाइ उनको थियो । उनले थपे, “संक्रमणकालीन न्यायले दिगो शान्ति कायम गर्न महत्वपूर्ण भूमिका खेल्छ । तर, यो सजिलो छैन, यो जटिल प्रक्रिया हो ।”
मानवअधिकार उल्लंघनका सबै पीडितहरूले न्याय पाउनुपर्ने उनले बताए । “नेपालको प्रगति र समाधान खोज्ने प्रयासको म यहाँ स्वागत गर्दछु । यो प्रक्रियामा नेपाल एक्लो छैन,” उनले भने ।
अन्तर्राष्ट्रिय मापदण्डहरू र सर्वोच्च अदालतको आदेशअनुसार संक्रमणकालीन न्याय टुङ्गाउन उनले सुझाव दिएका छन् । “यसलाई व्यवहारमा उतार्न संयुक्त राष्ट्रसंघ तपाईँलाई सहयोग गर्न तयार छ,” उनले भने ।
