काठमाडौं । आजदेखि बजेट अधिवेशन सुरु हुने भएको छ । आज दिउँसो २ बजेका लागि संघीय संसद्का दुवै सदनको अधिवेशन आह्वान गरिएको छ ।

वैशाख २० गते बसेको मन्त्रिपरिषद्को बैठकले संसद् अधिवेशन आह्वानका लागि राष्ट्रपतिसमक्ष सिफारिस गर्ने निर्णय गरेको थियो । वैशाख २१ गते राष्ट्रपति रामचन्द्र पौडेलले शुक्रबारका लागि अधिवेशन आह्वान गरेका थिए ।

हिउँदे अधिवेशन अन्त्य भएको तीन सातापछि बजेट अधिवेशन सुरु हुन लागेको हो । हिउँदे अधिवेशन वैशाख २ गते अन्त्य भएको थियो । 

बैठकको सुरुमा सभामुखले राष्ट्रपतिबाट प्राप्त अधिवेशन आह्वानसम्बन्धी पत्रको बेहोरा पढेर सुनाउनेछन् । त्यसपति सभामुखले राष्ट्रपतिको कार्यालयबाट प्राप्त विधेयक प्रमाणीकरण सम्बन्धी पत्रको बेहोरा पढेर सुनाउनेछन् ।

यसैगरी सभामुखले प्रधानमन्त्री तथा मन्त्रिपरिषद्को कार्यालयबाट प्राप्त कार्यभार थपसम्बन्धी पत्रको बेहोरा पढेर सुनाउने कार्यसूची छ ।

त्यसपछि  सभामुखले आफू तथा उपसभामुखको अनुपस्थितिमा बैठकको अध्यक्षता गर्न सदस्यहरूको मनोनयन गर्नेछन् ।

आजकै बैठकमा शिक्षा, स्वास्थ्य तथा सूचना प्रविधि समितिका सभापति अम्मरबहादुर थापाले सुरक्षण मुद्रण सम्बन्धी विधेयक सम्बन्धी समितिको प्रतिवेदन, २०८० पेस गर्ने कार्यसूची छ ।

यसैगरी उद्योग, वाणिज्य तथा आपूर्ति मन्त्री दामोदर भण्डारीले राष्ट्रियसभामा उत्पत्ति भएको विद्युतीय व्यापार विधेयक, २०८० लाई दफाबार छलफलका लागि सम्बन्धित समितिमा पठाइयोस् भन्ने प्रस्ताव प्रस्तुत गर्ने कार्यसूची छ ।

यसअघि संसद् बैठकबारे बिहीबार सभामुख देवराज घिमिरेले संसदीय दलका प्रमुख सचेतक र सचेतकहरूसँग छलफल गरेका थिए । खासगरी कांग्रेसले संसद् बैठक अवरुद्ध गर्दै आएको विषयमा छलफल भएको थियो । तर, बैठक बिनानिष्कर्ष टुंगिएको थियो ।

नेकपा (एमाले)का प्रमुख सचेतक महेशकुमार बर्तौलाले बैठकमा आजको प्रतिनिधिसभा बैठकमा शीर्ष नेताहरूले सम्बोधन गर्ने तय भएको बताएका छन् ।

"प्रतिनिधिसभाको बैठकमा बैठकमा व्यवस्थापनसँग सम्बन्धित कुनैपनि कार्यसूची नराख्ने र शीर्ष नेताहरूले सम्बोधन गर्नुहुनेछ । दलका नेताहरूले बोल्नुहुन्छ," उनले बिहीबार भनेका थिए ।

राष्ट्रिय स्वतन्त्र पार्टीका प्रमुख सचेतक सन्तोष परियारले आजको प्रतिनिधिसभा बैठकमा उपप्रधान एवं गृहमन्त्री रवि लामिछानेले संसद्‌मा सम्बोधन गर्ने बताएका छन् ।

कांग्रेसले आज बिहान साढे ८ बजेका लागि संसदीय दलको बैठक बोलाएको छ । बैठकले संसद्‌‌मा कसरी प्रस्तुत हुने भन्ने विषयमा निर्णय लिनेछ ।