अमरावती (भारत) । भारतको आन्ध्र प्रदेशमा रेल दुर्घटनामा मृत्यु हुनेको संख्या १३ पुगेको छ । विजयनगरम जिल्लामा दुर्घटना भएको र उद्धारकार्य जारी रहेको प्रहरीले जनाएको छ ।
विजयनगरमका प्रहरी सुपरिटेन्डेन्ट एम दीपिकाले भनिन्, “अहिलेसम्म १३ जनाको मृत्यु भएको छ । तीमध्ये सातजनाको सनाखत भएको छ र अरूको पहिचान हुन बाँकी छ ।”
यसअघि, इस्ट कोस्ट रेलवेका सीपीआरओ विश्वजीत साहुले ट्रयाक पुनःस्थापनाको काममा ध्यान दिइएको बताएका थिए ।
“उद्धारकार्य अहिले सकिएको छ । हामीले फसेका यात्रीका लागि बस र रेलको व्यवस्था गरेका छौँ । १८ रेल रद्द गरिएको छ र २२ वटा रेलमार्ग परिवर्तन गरिएको छ । हामी आज साँझ ४ बजेसम्म ट्रयाक खाली गर्ने प्रयास गरिरहेका छौँ,” उनले भने ।
उनले सामान्य घाइतेलाई नजिकैको अलामान्दा अस्पतालमा भर्ना गरिएको पनि जानकारी दिए ।
“सामान्य घाइते भएकाको अलामान्दा अस्पतालमा प्राथमिक उपचार भइरहेको छ । गम्भीर घाइतेलाई विजयनगरम र विशाखापट्टनम अस्पतालामा लगिएको छ । हामीले फसेका यात्रीका लागि रेल र बसको व्यवस्था गरेका छौँ । केही रेललाई रद्द र डाइभर्ट गरेका छौँ । हामीले सहायता डेस्क स्थापना गरेर यात्रीलाई एसएमएसमार्फत सूचित गरिरहेका छौँ,” उनले भने ।
उनले थपे, “हाम्रा दुई एआरटी (एक्सिडेन्ट रिलिफ ट्रेन) टिमले त्यहाँ काम गरिरहेका छन् र सम्बलपुर मुख्यालय डिभिजनका सबै कर्मचारी पनि त्यहाँ काम गरिरहेका छन् । साँझ ४ बजेसम्म ट्रयाक सफा गर्ने प्रयास गरिरहेका छन् ।”
आइतबार साँझ विजयनगरममा विशाखापट्टनम–रगडा यात्रीवाहक रेल सोही मार्गबाट गइरहेको विशाखापट्टनम–रगडा रेलसँग ठोक्किएपछि केही डिब्बा लिकबाट खसेको अधिकारीहरूले बताएका छन् । रासस/एएनआई
