काठमाडौं । चालु आर्थिक वर्ष २०८०/०८१ को दुई महिनामा नेपालले कूल निर्यातभन्दा साढे आठ अर्ब रुपैयाँ बढीको पेट्रोलियम पदार्थ आयात गरेको छ ।

भन्सार विभागको तथ्यांकअनुसार चालु आबको साउन–भदौमा नेपालले कुल २६ अर्ब, ४४ करोड ७० लाख ३३ हजार निर्यात गरेको छ । उक्त समय अवधिमा ३४ अर्ब ९३ करोड ९९ लाख ८३ हजार रुपैयाँको पेट्रोलियम पदार्थ आयात गरेको छ ।

दुई महिनामा आयात निम्ति दुई खर्ब ५९ अर्ब ७४ करोड ९८ लाख ९८ हजार रुपैयाँ बाहिरिएको छ । नेपालले पेट्रोलियम पदार्थको आयात नेपाल आयल निगमले गर्छ । निगमले इन्डियन आयल कर्पोरेशनबाट सीधै उपभोग गर्न सकिने पेट्रोलियम पदार्थको खरिद गर्ने गर्छ ।

भन्सार विभागको तथ्यांकअनुसार नेपालले दुई महिनामा ११ अर्ब ३० करोड ५७ लाख ७३ हजार रुपैयाँको एक लाख १२ हजार १८२ किलोलिटर पेट्रोल आयात गरेको छ । उक्त अवधिमा ५५ करोड ९४ लाख १६ हजार रुपैयाँको ८१ लाख ८५ हजार ६६९ लिटर हवाईफ्युल आयात गरेको छ ।

साउन र भदौमा १५ अर्ब ७४ करोड ८४ लाख ८३ हजार रुपैयाँको एक लाख ५१ लाख ३७२ किलोलिटर डिजेल आयात गरेको जानकारी विभागले दिएको छ । उक्त दुइ महिनामा सात अर्ब ३२ करोड ६३ लाख १३ हजार रुपैयाँको आठ करोड ८२ लाख ७१ हजार ४८६ केजी खाना पकाउने एलपीजी ग्यास आयात गरेको छ ।

१४ अर्ब राजश्व संकलन

नेपालले दुई महिनामा पेट्रोल, डिजेल, हवाई फ्युल र एलपीजी ग्यासबाट १४ अर्ब रुपैयाँ राजश्व संकलन गरेको छ ।  विभागको तथ्यांकअनुसार साउन र भदौमा १४ अर्ब एक करोड ९८ लाख ६० हजार रुपैयाँ राजस्व संकलन भएको छ ।

कूल निर्यात पनि घट्यो 

गत वर्ष २०७९–०८० को तुलनामा कूल निर्यातमा पनि दुई अर्ब २३ करोड ३४ लाख चार रुपैयाँ कमी आएको छ  ।  गत वर्षको साउन र भदौमा कुल २८ अर्ब ६८ करोड चार लाख ३७ हजार रुपैयाँ बराबरका सामान निर्यात भएको थियो ।