site stats
बाह्रखरी :: Baahrakhari
खेल
Global Ime bankGlobal Ime bank
नेपाललाई हराउँदै यूएईले जित्यो उपाधि

काठमाडौं । रोमाञ्चक फाइनलमा घरेलु टिम नेपाललाई चार विकेटले हराउँदै नेपाल त्रिदेशीय ट्वान्टी–२० शृंखलाको उपाधि युनाइटेड अरब इमिरेट्स (यूएई) ले जितेको छ ।

कीर्तिपुरस्थित त्रिवि क्रिकेट मैदानमा सम्पन्न फाइनलमा नेपालले प्रस्तुत गरेको १६३ रनको लक्ष्य यूएईले १९.५ ओभरमा ६ विकेट गुमाएर भेट्टायो ।

यूएईलाई जितका लागि अन्तिम ओभरमा सात रनको आवश्यकता थियो । नेपालबाट बलिङका लागि आएका करण केसीको पहिलो बलमा यूएईका बसिल हमेदले दुई रन लिए । करणले दोस्रो बल डट फ्याके ।

तेस्रो बलमा बसिलले एक रन हुँदा त्यसपछिको बल वाइड भयो । चौथो बलमा अफ्जल खानले एक रन लिएपछि यूएईलाई अन्तिम दुई बलमा दुई रनको आवश्यकता थियो । तर, पाँचौँ बलमा बसिल हमेदले छक्का प्रहार गर्दै यूएईले शृंखलाको उपाधि टिमलाई दिलाए ।

Nepal-&-UAE1-1698399130.jpg

यूएईको जितमा कप्तान मुहम्मद वसिमले २२ बलमा सात चौका र दुई छक्कासहित ४५ रन बनाए । वसिमले पहिलो विकेटका लागि आर्यन्स शर्मासँग ६.४ ओभरमा ७१ रनको साझेदारी गर्दै यूएईलाई आक्रामक सुरुआत दिलाएका थिए । आर्यन्सले २५ रन थपे ।
    
भ्रित्या अरविन्दले २६ र आलिसान सरिफुले १३ रन बनाए । यूएईबाट ‘म्याच विनर’ बनेका बसिल हमेदले १६ बलमा दुई छक्कासहित २२ रन जोडे । अली नासिरले ११ रन थपे ।

नेपालका गुल्सन झा र अभिनास बोहराले समान दुई विकेट लिए । कुशल मल्लले एक विकेट लिए । नेपाललाई अर्को एक विकेट भने दीपेन्द्रसिंह ऐरीले रनआउटमार्फत दिलाए ।

त्यसअघि ओपनर कुशल भुर्तेलले अर्धशतक बनाएपछि टस हारेर ब्याटिङमा आएको नेपालले निर्धारित २० ओभरमा आठ विकेट गुमाएर १६२ रनको योगफल खडा ग¥यो।

भुर्तेलले ५० रन बनाए । उनले २९ बलमा ६ चौका र तीन छक्का प्रहार गरे । ट्वान्टी–२० अन्तर्राष्ट्रिय क्रिकेटमा भुर्तेलको यो छैटौँ अर्धशतक हो ।

उनले पहिलो विकेटका लागि आसिफ शेखसँग पाँच ओभरमा ४३ रनको साझेदारी गर्दै नेपाललाई उत्कृष्ट सुरुआत दिलाएका थिए । तर, त्यसपछिका ब्याटरले उल्लेखनीय प्रदर्शन गर्न नसक्दा नेपाल ठूलो योगफलसम्म पुग्न सकेन । आसिफ सात रनमा आउट भएका थिए ।

नेपाली टिमको खातामा दीपेन्द्रसिंह ऐरीले २०, कप्तान रोहितकुमार पौडेलले १८, सोमपाल कामीले १३ र सन्दीप जोराले १० रन थपे ।

नेपालले पहिलो १० ओभरमा तीन विकेट गुमाएर ९५ रन बनाएको थियो । तर, त्यसपछि लगातार विकेट गुमाउँदा अन्तिम १० ओभरमा नेपालले ६७ रनमात्र थप्न सक्यो ।

नेपालबाट नवौँ नम्बरमा ब्याटिङका लागि आएका करण केसीले १७ बलमा दुई चौका र एक छक्कासहित २३ रन थपे ।

यूएईका आयान अफजल खानले तीन विकेट लिए । अली नासिर र जहुर खानले समान दुई विकेट लिए । जुनैद सिद्दिकीले एक विकेट हात पारे ।

नेपालमै हुने आईसीसी ट्वान्टी–२० विश्वकप छनोटको तयारीका लागि आयोजित शृंखलामा नेपाल र यूएईसँगै हङकङको सहभागिता थियो । शृंखलामा नेपालले लिग चरणमा शतप्रतिशत जितसहित फाइनलको यात्रा तय गरेको थियो ।

यूएईले भने चार खेलबाट दुई अंकसहित दोस्रो स्थानमा रहँदै फाइनलमा स्थान बनाएको हो । यूएई र हङकङको समान अंक भए पनि नेट रनरेटका आधारमा मुहम्मद वसिमको कप्तानीमा रहेको टिम फाइनल प्रवेश गरेको थियो ।

लिग चरणमा नेपालले पहिलो खेलमा यूएईलाई सात विकेटले, दोस्रो खेलमा हङकङलाई ६ विकेटले, तेस्रो खेलमा पुनः हङकङलाई ७९ र चौथो खेलमा यूएईलाई पाँच विकेटले हराएको थियो ।

प्रकाशित मिति: शुक्रबार, कात्तिक १०, २०८०  १४:४९
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro