काठमाडौं । आईसीसी एकदिवसीय विश्वकपमा श्रीलंकासँग आठ विकेटले पराजित भएसँगै सेमिफाइनलमा पुग्ने इंग्ल्यान्डको सम्भावना कमजोर बनेको छ ।

बिहीबार भारतको बैंगलोरस्थित एमए चिदम्बरम रंगशालामा भएको खेलमा साविक विजेता इंग्ल्यान्डले प्रस्तुत गरेको १५७ रनको लक्ष्य श्रीलंकाले २५.४ ओभरमा दुई विकेट गुमाएर पूरा गर्‍यो ।

श्रीलंकाको जितमा पथुम निसांकाले ७७ रन जोडे । उनले ८३ बलमा सात चौका र दुई छक्का प्रहार गरे । सदीरा समराविक्रमाले ५४ बलमा सात चौका र एक छक्कासहित ६५ रन बनाए । कप्तान कुशल मेन्डिसले ११ रन थपे ।

इंग्ल्यान्डका डेविड विलीले दुई विकेट लिए ।

त्यसअघि, टस जितेर ब्याटिङमा उत्रिएको इंग्ल्यान्डले ३३.२ ओभरमा सबै विकेट गुमाएर १५६ रन बनाएको थियो ।

इंग्ल्यान्डका बेन स्टोक्सले ४३ रन बनाए । जोनी बेरोस्टोले ३०, डेविड मलानले २८, मोइन अलीले १५ र डेविड विलीले १४ रन जोडे ।

इंग्ल्यान्डलाई सस्तैमा समेट्न श्रीलंकाका लहिरु कुमाराले तीन विकेट लिए । कासुन रजिथा र एन्जोलो म्याथ्युजले समान दुई र महिस थिक्षणाले एक विकेट लिए ।

जितसँगै पाँच खेलबाट चार अंक जोडेको श्रीलंका तालिकाको पाँचौँ स्थानमा उक्लिएको छ । श्रीलंकाको सेमिफाइनल सम्भावना कायमै छ ।

श्रीलंकासँगको हारले इंग्ल्यान्डको भने अन्तिम चारमा पुग्ने सम्भावना कमजोर बनेको छ । पाँच खेलबाट दुई अंकको इंग्ल्यान्ड नवौँ स्थानमा छ ।