काठमाडौं । भारतमा जारी आईसीसी एकदिवसीय विश्वकपमा श्रीलंकाले पहिलो जित निकालेको छ । शनिबार सम्पन्न खेलमा श्रीलंकाले नेदरल्यान्ड्सलाई पाँच विकेटले हराएको हो ।

भारतको लखनउस्थित एकाना क्रिकेट रंगशालामा भएको खेलमा नेदरल्यान्ड्सले प्रस्तुत गरेको २६३ रनको लक्ष्य श्रीलंकाले ४८.२ ओभरमा पाँच विकेट गुमाएर पूरा गर्यो । श्रीलंकाको जितमा सदिरा समाविक्रमाले अविजित ९१ रन बनाए । उनले १०७ बलमा सात चौका प्रहार गरे । पथुम निसान्काले ५१ रन थपे । चरिथ असलन्काले ४४ र धनन्जय डी सिल्भाले ११ रन जोडे । नेदरल्यान्ड्सका आर्यन दत्तले तीन विकेट लिए । पाउल भान मिकेरेन र कोलिन अकरमनले समान एक विकेट लिए ।

त्यसअघि टस जितेर ब्याटिङमा आएको नेदरल्यान्ड्सले ४९.४ ओभरमा सबै विकेट गुमाएर २६२ रनको योगफल खडा गरेको थियो । नेदरल्यान्ड्सका साइब्रान्ड एन्जलब्रेटले ७० रन बनाएका थिए । लोगन भान विकले ५९ रन थपे । कोलिन अकरमनले २९ रन बनाउँदा म्याक्स ओडाउड र कप्तान स्कट एडवार्डले समान १६ रन जोडे । श्रीलंकाका कासुन रजिथा र दिल्सान मदुसन्काले समान चार विकेट लिए । महिष थिक्षणाले एक विकेट हात पारे ।

प्रतियोगितामा पहिलो जित निकालेको श्रीलंका चार खेलबाट दुई अंक जोड्दै आठौं स्थानमा उक्लिएको छ । समान अंक जोडेको नेदरल्यान्ड्स तालिकाको सातौं स्थानमा छ ।

शनिबार नै भएको अर्को खेलमा दक्षिण अफ्रिकाले इङ्ल्यान्डविरुद्ध २२९ रनको फराकिलो जित निकालेको छ । दक्षिण अफ्रिकाले प्रस्तुत गरेको ४०० रनको लक्ष्य पछ्याउने क्रममा इङ्ल्यान्ड २२ ओभरमा १७० रनमै समेटियो । जितसँगै चार खेलबाट ६ अंक जोडेको दक्षिण अफ्रिका तेस्रो स्थानमा छ । चार खेलबाट दुई अंक जोडेको इङ्ल्यान्ड तालिकाको आठौं स्थानमा छ ।