काठमाडौं । घरेलु टिम भारतले आईसीसी एकदिवसीय विश्वकपमा आफ्नो अपराजित यात्रालाई चौथो खेलसम्म लम्ब्याएको छ । भारतले बिहीबार सम्पन्न खेलमा बंगालदेशलाई सात विकेटले स्तब्ध बनाउँदै प्रतियोगितामा आफ्नो विजयी यात्रालाई चौथो खेलसम्म पनि जारी राखेको हो ।

पुनेस्थित महाराष्ट्र क्रिकेट संघ रंगशालामा बंगलादेशले प्रस्तुत गरेको २५७ रनको लक्ष्य भारतले ४१.३ ओभरमा तीन विकेट गुमाएर भेट्टायो ।

भारतको जितमा विराट कोहलीले १०३ रन बनाए । उनले ९७ बलमा ६ चौका र चार छक्का प्रहार गरे । शुभमन गिलले ५५ बलमा पाँच चौका र दुई छक्कासहित ५३ रन थपे । कप्तान रोहित शर्माले ४८, केएल राहुलले ३४ र श्रेयश अय्यरले १९ रन बनाए ।

बंगलादेशका मेहदी हसन मिराजले दुई र हसन महम्मदले एक विकेट लिए ।

त्यसअघि, टस जितेर ब्याटिङ रोजेको बंगलादेशले निर्धारित ५० ओभरमा आठ विकेट गुमाएर २५६ रनको योगफल तयार पारेको थियो ।

बंगालदेशका लिटोन दासले ६६ रन बनाएका थिए । तन्जिद हसनले ५१, महमुदुल्लाहले ४६, मुस्फिकर रहिमले ३८, तोहिद हृदयले १६ र नासुम अहमदले १४ रन बनाए ।

भारतका रवीन्द्र जडेजा, मोहम्मद सिराज र जसप्रित बुमराहले समान दुई विकेट लिए । यस्तै, कुलदीप यादव र शार्दुल ठाकुरले समान एक विकेट लिए ।

जितसँगै चार खेलमा आठ अंक जोडेको भारत दोस्रो स्थानमा छ । लगातार तेस्रो हार बेहोरेको बंगलादेश दुई अंकसहित तालिकाको सातौँ स्थानमा छ ।