काठमाडौं । नेपालीको महान् चाड विजयादशमी एवं दीपावलीका अवसरमा मुस्लिम आयोगले सम्पूर्ण नागरिकमा शुभकामना व्यक्त गरेको छ । बडादसैँ, तिहार, नेपाल संवत्, छठलगायत पर्वका अवसरमा बुधबार ललितपुरमा एक कार्यक्रम गरी आयोगले शुभकामना व्यक्त गरेको हो ।

कार्यक्रममा राष्ट्रिय मानवअधिकार आयोगका अध्यक्ष तपबहादुर मगरले दसैँ सबै नेपालीको चाड भएकाले उत्सवका साथ मनाउनुपर्ने बताए । उनले नेपाली शान्तिप्रिय भएकाले धर्मधर्मबीचमा झैझगडा र द्वन्द्व गर्न नहुनेमा जोड दिए ।

सबै धर्मावलम्बी एकापसमा मिलेर बस्नुपर्ने उनले बताए । उनले पछिल्लो समय केही छिटपुट घटना भएको भन्दै यसलाई समाधान गरेर अघि बढ्न जरुरी रहेको उल्लेख गरे ।

उनले बाहिरबाट आएका व्यक्तिको उक्साहटमा साम्प्रदायिक द्वन्द्व हुने गरेको औँल्याए । धर्मका नाममा द्वन्द्व गर्न नहुने उनले बताए ।

कार्यक्रममा मुस्लिम आयोगका अध्यक्ष समिम मिया अन्सारीले लामो समयदेखि हिन्दु, मुस्लिम, इसाइ, किराँतलगायत धर्मावलम्बी र समुदाय एकापसमा मिलेर बसेको बताए । यसलाई सधैँ निरन्तरता दिनुपर्ने उनको भनाइ छ ।

पछिल्लो केही समययता केही असामाजिक र अराजक तत्त्वले नेपालमा रहेका धर्मावलम्बी बीचमा खेल्ने र धार्मिक सहिष्णुतालाई खल्बल्याउने प्रयास गरेको बताए । हिन्दु, मुस्लिम, बौद्ध र किराँतका नाममा असामाजिक कार्य गर्नेलाई असफल बनाउनुपर्नेमा उनले जोड दिए ।

अपराध गर्ने कुनै धर्मको नहुने र अपराधी हुने भएकाले त्यस्ता व्यक्तिलाई कारबाही गर्नुपर्ने उनले बताए । त्यसक्रममा सिंगो समुदायमाथि आक्षेप लगाउन नहुने उनको भनाइ छ ।