काठमाडौं । इजरायलबाट २५३ जना नेपाली विद्यार्थी लिएर नेपाल एयरलाइन्सको जहाज नेपालतर्फ उडेको छ  । जहाजको ट्रान्जिट युनाइटेड अरब इमिरेट्स (यूएई)को दुबईमा रहेको छ ।

जहाज दुबईमा केहीबेर रोकिएपछि काठमाडौंतर्फ उड्ने छ । जहाज राति साढे १ बजे काठमाडौं आइपुग्ने जनाइएको छ । निर्धारित समयभन्दा ढिला जहाज उडेकोले काठमाडौंमा अवतरण गर्ने समय पछि धकेलिएको हो । 

यसअघि उक्त जहाज आज (बिहीबार) राति सवा ९ बजे काठमाडौंस्थित त्रिभुवन अन्तर्राष्ट्रिय विमानस्थलमा अवतरण गर्ने जनाइएको थियो ।

प्यालेस्टिन चरमपन्थी समूह हमास र इजरायबीच युद्ध चर्किएपछि त्यहाँ रहेका नेपालीलाई उद्धार गरी ल्याउन सरकारले जहाज पठाएको हो । 

सरकारले बिहीबार बिहान नेपालीको उद्धारको लागि जहाज इजरायल पठाएको थियो । 

नेपालीको उद्धार गरी ल्याउन परराष्ट्रमन्त्री एनपी साउद र परराष्ट्र मन्त्रालयका सहसचिव शरदराज आरन जहाजमा गएका थिए । 

शनिबार हमासले इजरायलमाथि आक्रमण गरेपछि त्यहाँ रहेका नेपालीले उद्धार गर्न सरकारसँग अनुरोध गरेका थिए । सोहीअनुसार सरकारले उनीहरूलाई उद्धार गरी नेपाल फर्काउन सरकारले जहाज पठाएको हो ।