काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले अख्तियार दुरुपयोग अनुसन्धान आयोगले 'खुट्टा कमाएको' टिप्पणी गरेका छन् ।

बुधबार राज्य व्यवस्था तथा सुशासन समितिको बैठकमा लामिछानले सार्वजनिकरूपमा आएका विभिन्न अनियमितताबारे अख्तियारले छानबिन नगरेको बताए ।

उनले 'लडाकु शिविरको घोटाला अख्तियारभित्र हरायो भन्ने छ नि ?' भन्दै प्रश्न गरे ।

समितिले बुधबार अख्तियार दुरुपयोग अनुसन्धान आयोग ऐन, २०४८ लाई संशोधन गर्न बनेको विधेयकको विषयमा छलफल गरेको थियो । छलफलमा अख्तियारका प्रमुख आयुक्त प्रेमकुमार राईसहित अन्य आयुक्तहरूको उपस्थिति थियो ।

बैठकमा सांसद लामिछानेले 'वाइडबडी खरिद, यती होल्डिङ्स, ओम्नी प्रकरण तथा तत्कालीन एन्फा अध्यक्ष गणेश थापाले गरेको घोटालाको फाइल कहाँ पुग्यो' भन्दै प्रश्न गरे ।

“अनुसन्धानमा छ भन्ने रेडिमेड जवाफ आउँछ, थाहा छ । तपाईंहरूको वार्षिक बजेट एक अर्बको छ । बजेट माग चाहिँ दुई अर्ब गर्नुहुन्छ । काम २५ प्रतिशत मात्रै हुन्छ । कमसेकम बजेट बराबर त सफलता हात पारौँ,” लामिछानेले भने ।

उनले भ्रष्टाचारको फाइल अघि बढाउन कानुनी अवरोध रहे आफूहरूलाई जानकारी गराउन पनि आग्रह गरे । उनले सोझा जनतालाई मात्र अख्तियारको डर लाग्ने गरेको बताए । लामिछानेले 'ठूलो माछालाई अख्तियारको किन डर हुँदैन' भनेर प्रश्न गरे ।

“सामान्य मानिसहरूलाई अख्तियारले ठूला मानिसहरूलाई कारबाही गर्छ भन्ने डर नै छैन,” लामिछानेले भने, “तलबाट कारबाही हुन्छ । सहसचिव, उपसचिव भन्दा माथिको मान्छे देख्दैन अख्तियारले ? यही हो अख्तियारको नजरमा ठूलो माछा ?”