site stats
बाह्रखरी :: Baahrakhari
खेल
Global Ime bankGlobal Ime bank
आईसीसी एकदिवसीय विश्वकप : इंग्ल्यान्डको पहिलो जित

काठमाडौं । आईसीसी एकदिवसीय विश्वकपमा साविक विजेता इंग्ल्यान्डले पहिलो जित निकालेको छ । ओपनर डेविड मलानको शतक र रिस टोप्लेको कसिलो बलिङप्रेरित इंग्ल्यान्डले मंगलबार बंगलादेशविरुद्ध १३७ रनको फराकिलो जित निकालेको हो ।

भारतको धर्मशालास्थित हिमाचल प्रदेश क्रिकेट एसोसियसन रंगशालामा सम्पन्न खेलमा इंग्ल्यान्डले प्रस्तुत गरेको ३६४ रनको लक्ष्य पछ्याउने क्रममा बंगलादेश ४८.२ ओभरमा २२७ रनमै समेटियो ।

बंगलादेशका ओपनर लिटोन दासले ७६ रन बनाए पनि टिमको हार टार्न सकेनन् । मुसफिकर रहिमले ५१ रन थपे । तोहिद हृदोयले ३९, तक्षिन अहमेदले १५, मेहदी हसनले १४ र सोरिफुल इस्लामले १२ रन बनाए ।

बंगलादेशलाई सस्तैमा समेट्न इंग्ल्यान्डका रिस टोप्लेले चार विकेट लिए । १० ओभर बलिङ गरेका टोप्लेले एक मेडन राख्दै ४३ रन खर्चिए । क्रिस वोक्सले दुई विकेट लिए । साम करन, मार्क उड, आदिल राशिद र लियम लिभिङस्टोनले समान एक विकेट हात पारे ।

त्यसअघि, मलानले शतक बनाएपछि टस हारेर ब्याटिङमा आएको इंग्ल्यान्डले निर्धारित ५० ओभरमा नौ विकेट गुमाएर ३६४ रनको योगफल खडा गरेको थियो ।

इंग्ल्यान्डका ओपनर मलानले १०७ बलमा १६ चौका र पाँच छक्कासहित १४० रन बनाए । एकदिवसीय अन्तर्राष्ट्रिय क्रिकेटमा मलानको यो छैटौँ शतक हो । अर्का ओपनर जोनी बेरेस्टोले ५९ बलमा आठ चौकासहित ५२ रन जोडे । यी दुईले पहिलो विकेटका लागि ११५ रनको साझेदारी गर्दै इंग्ल्यान्डलाई उत्कृष्ट सुरुआत दिलाएका थिए ।

जोए रुटले ६८ बलमा आठ चौका र एक छक्कासहित ८२ रन बनाए । रुट र मलानले पनि दोस्रो विकेटका लागि १५१ रनको साझेदारी गरेका थिए । कप्तान जस बटलर र ह्यारी ब्रुकले समान २० रन थपे । क्रिस वोक्सले १४ रन जोड्दा साम करन र आदील रासिदले समान ११ रन बनाए ।

बंगलादेशका मेहदी हसनले चार विकेट लिए । आठ ओभर बलिङ गरेका हसनले ७१ रन खर्चिए । सोरिफुल इस्लामले तीन विकेट लिँदा तक्षिन अहमेद र साकिब अल हसनले समान एक विकेट हात पारे ।

प्रतियोगितामा पहिलो जित निकालेको इंग्ल्यान्ड दुई अंकसहित तालिकाको पाँचौँ स्थानमा उक्लिएको छ । इंग्ल्यान्ड भने पहिलो खेलमा न्युजिल्यान्डसँग नौ विकेटले पराजित भएको थियो ।

प्रतियोगितामा पहिलो हार बेहोरेको बंगलादेश समान दुई अंकसहित तालिकाको छैटौँ स्थानमा छ । यसअघि, पहिलो खेलमा बंगलादेशले अफगानिस्तानलाई ६ विकेटले हराएको थियो ।

प्रकाशित मिति: मंगलबार, असोज २३, २०८०  १९:०३
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
सरकारले तत्काल सम्बोधन गरोस् !
सरकारले तत्काल सम्बोधन गरोस् !
Hamro patroHamro patro