काठमाडौं । प्रमुख प्रतिपक्ष दल नेकपा (एमाले)का सांसद रघुजी पन्तले राजनीतिक दलहरु सच्चिनुपर्ने बताएका छन् ।

गणतन्त्रविरुद्ध बोल्ने राजावादीहरुसँग सवालजवाफ गर्नेभन्दा पनि गल्ती गर्ने राजनीतिक दल र त्यसका नेताहरु सच्चिएर अघि बढनुपर्ने उनको भनाइ छ ।

आइतबार संघीय संसद् भवन परिसरमा सञ्चारकर्मीहरुले राखेका जिज्ञासाको जवाफ दिने क्रममा सांसद पन्तले राजनीतिक दलहरुले जनतालाई पुनर्विश्वास दिलाउनुपर्ने धारणा समेत राखे ।

“राजावादीहरुसँग सवालजवाफ गरेर मात्रै पुग्दैन । लोकतन्त्रमा हामीले आफू सच्चिनुपर्छ । जो गल्ती गरेका छन्, ती नेताहरु सच्चिनुपर्छ,” उनले भने, “पार्टीहरुले सच्चिनुु पर्छ । दलहरु जनताको छेउमा जानुपर्छ । दलहरुले जनतालाई पुनर्विश्वास दिलाउनुपर्ने आवश्यकता छ ।”

सांसद पन्तले राजनीतिक दलहरुले जनताको बीचमा जाने कामलाई तीव्रता दिनुपर्ने पनि बताए ।