काठमाडौं । सत्तारूढ दल नेपाली कांग्रेसका सांसद राजु थापाले शिक्षा क्षेत्र सुधार गर्नका लागि शिक्षामा बजेट बढाउनुपर्ने बताएका छन् ।

शुक्रबारको प्रतिनिधिसभा बैठकमा विद्यालय शिक्षा विधेयक, २०८० माथिको सैद्धान्तिक छलफलमा भाग लिँदै थापाले शिक्षा क्षेत्रमा कुल बजेटको २० प्रतिशत विनियोजन हुनुपर्ने बताए ।

“सामुदायिक विद्यालयको शिक्षाको स्तर खस्कियो भनेर भनिन्छ । तर, प्रत्येक वर्ष सरकारले ल्याउने बजेटले शिक्षा क्षेत्रलाई बेवास्ता गर्ने गरेको छ । अब हामीले साच्चिकै शिक्षामा सुधार गर्ने हो भने कुल बजेटको २० प्रतिशत रकम शिक्षा क्षेत्रमा छुट्याउनुपर्छ,” उनले भने ।

गाउँगाउँमा सामुदायिक विद्यालय सञ्चालन गर्नका लागि समुदायबाट पैसा उढाउनुपर्ने बाध्यता रहेको र स्कुल बसका लागि विदेशी राष्ट्र गुहार्नुपरेको भन्दै यसका लागि सरकारले उचित पहल गर्नुपर्ने थापाको भनाइ थियो ।

संसद्मा प्रस्तुत शिक्षा विधेयकमा रहेका कमीकमजोरीलाई सच्चाएर शिक्षकका जायज माग पूरा गर्नुपर्नेमा उनको जोड थियो ।

यस्तै, सांसद थापाले देशको मेरुदण्डका रुपमा रहेको शिक्षा क्षेत्र तहसनहस हुँदै गएकोप्रति चिन्ता व्यक्त गर्दै अबको शिक्षा विश्वबजारमा बिक्ने खालको बनाउने गरी सरकारले तयारी थाल्नुपर्ने बताए ।