काठमाडौं । नेपाल नागरिक उड्डयन प्राधिकरणले नेपाल वायुसेवा निगमका दुईजना प्राविधिकलाई काममा प्रतिबन्ध लगाएको छ । उनीहरूले मर्मत गरेको जहाजमा पटकपटक समस्या देखिएपछि निगमका ड्युटी मेन्टेनेन्स म्यानेजर र कन्टिन्युइङ एयरओर्दिनेस (सीए) म्यानेजरलाई काममा प्रतिबन्ध लगाइएको प्राधिकरणले जनाएको छ ।

पछिल्लोपटक उनीहरूले मर्मत गरेको नेपाल एयरलाइन्सको ३२०, ९एन–एकेएक्स जहाज बुधबार काठमाडौंबाट साउदी अरेबियाको दमामका लागि उडेको थियो । तर, 'टिकास'मा खराबी देखिएपछि विमान पाकिस्तानको कराँची पुगेर फर्किएको थियो । उक्त विमान बुधबार राति सवा ११ बजे त्रिभुवन अन्तर्राष्ट्रिय विमानस्थलमा अवतरण गरेको थियो ।

टिकास भनेको जहाज आसपास केही खतरा भए त्यसको संकेत दिने प्रविधि हो । टिकासले काम नगरेपछि लामो दुरीमा जहाज उडाउँदा दुर्घटनाको उच्च जोखिम हुने भएकाले विमान फर्किएको थियो ।

उनीहरूले मर्मत गरेको वायुयानमा पटकपटक प्राविधिक समस्या आएकाले अर्को निर्णय नभएसम्मका लागि आजैबाट लागु हुने गरी काममा प्रतिबन्ध लगाएको प्राधिकरणका सहायक प्रवक्ता ज्ञानेन्द्र भुलले जानकारी दिए । 

"अब उनीहरूमाथि निगमले पनि आन्तरिक अनुसन्धान गर्छ, हामीले पनि गर्छौं । त्यसपछि निर्णय हुन्छ," भुलले भने ।

उनीहरूको नाम भने खुलाइएको छैन ।