काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले सरकार अस्थिरता र विद्वेष फैलान केन्द्रित भएको आरोप लगाएका छन् । मंगलबार प्रतिनिधिसभा बैठकमा समय लिएर बोलेका उनले सरकार राष्ट्रहितविरुद्ध लागिरहेको टिप्पणी गरे ।

“राष्ट्रहितविरुद्ध यो सरकार लागिरहेको छ, म उदाहरणसहित भन्दै छु । अहिलेसममका उपलब्धिहरूलाई सिध्याउन, कूटनीतिक सम्बन्ध खतम पार्न यो सरकार लागिरहेको छ । मन्त्री हुनु मात्रै उपलब्धि होइन,” ओलीले भने, “जनताका लागि काम गरौँ । जनताको हितका लागि उभिऊँ र लोकतन्त्रका पक्षमा अधिनायकवादका विरुद्ध उभिऊँ भनेर जनताले हामीलाई पठाएका हुन् । अनि, हाम्रो गन्तव्य मन्त्री मात्रै हुनसक्छ ?”

सत्ता गठबन्धनमा आबद्ध दलका नेताले देश र जनता बिर्सिएको उनको आरोप छ । 

“सभामुख महोदय, अस्थिरतालाई गतिशीलता ठान्ने, विभाजन र विद्वेषलाई उपलब्धि ठान्ने अहिलेको गठबन्धन छ । आफ्नो दलको विजयमा होइन, अन्य दलको विभाजनमा आफ्नो राजनीतिक उपलब्धि ठान्नेहरू हाम्रो लोकतन्त्र र राजनीतिक उपलब्धिलाई खतम पार्न सक्रिय छन् । सत्ताको लोभमा देश र जनता बिर्सिएका छन्,” ओलीले भने, “दल विघटन होलान, बन्लान्, तर जनता सदासदा रहिरहनेछन् । यस तथ्यलाई कमजोर पार्ने काम नगरौँ, म आग्रह गर्न चाहन्छु ।”

उनले सबै राजनीतिक दलका सांसदलाई सार्वभौमसत्ता, स्वतन्त्रता र राष्ट्रहितमा एकजुट हुन आह्वान गरे ।

“नेपालको विकास, नेपालीको सुख, नेपालीको स्वाभिमान बढाउन एकजुट हौँ । यो नालायक गठबन्धन टिकाउन एकजुट हुने होइन,” उनले भने, “विभिन्न वार्ताका माध्यमबाट म यो गठबन्धनलाई जिम्मेवार हुन ध्यानाकर्षण गराइरहेको छु । तर, यो गठबन्धन सरकार लोकतन्त्रका अवयवमाथि आक्रमण गरी सद्भाव भड्काउन प्रयत्नशील छ ।”

उनले सरकार नियम–कानुन र संविधानविरुद्ध लागिरहेको आरोप लगाए ।

“हामीले पहिले पढेका युद्धमा पनि नियम छन्, घाम झुल्किएपछि युद्ध सुरु हुने, यो गर्न पाइने, यो गर्न नपाइने हुन्छ,” ओलीले भने, “तर, यो सरकार संविधानमाथि आक्रमण गरिरहेको छ । असंवैधानिक गतिविधिमार्फत संविधानप्रदत्त अधिकार खोसेर संविधान बाहिर पारेर विद्रोहको आधार तयार पारिरहेको छ । सरकार आफैँ यस्ता विशृंखलता बढाउने गतिविधिको आयोजना गरिरहेको छ ।”

उनले सरकारले गठबन्धनभन्दा बाहिर कसैको अस्तित्व स्वीकार नगरेको जिकिर गरे । लोकतन्त्रमा प्रतिपक्ष दलको नेतामाथि आक्रमण गराउने सरकार हुन नसक्ने उनले बताए ।

“सरकार गठबन्धनभन्दा बाहिर अरूको अस्तित्व स्वीकार गर्दैन । प्रतिपक्षी दलको नेतामाथि हमला गराउने प्रयत्न गरिरहन्छ,” उनले भने, “हमलाकारीलाई पक्राउ गर्दैन, समातिहाल्यो भने तत्काल छोडिदिन्छ । प्रहरीको दाँत भाँच्नेहरूलाई केही नगर्नू भनेर निर्देशन दिन्छ ।”

उनले अहिले गठबन्धनमा रहेका प्रमुख भनिएका दलका कार्यकर्ता त्यसमा संलग्न रहेको आरोप लगाए । “यस्तो काम एक ठाउँ होइन, अनेक ठाउँ भइरहेको छ । अन्य दलका नेताहरूलाई धम्क्याउने, तर्साउने, क्षति पुर्‍याउने योजना बनाइन्छ, धम्क्याइन्छ,” उनले भने ।