काठमाडौं । चीनमा जारी १९औँ एसियाली खेलकुदमा नेपाली क्रिकेट टिमले देखाएको प्रदर्शनप्रति प्रधानमन्त्री पुष्पकमल दाहाल (प्रचण्ड)ले बधाई दिएका छन् ।

प्रधानमन्त्री प्रचण्डले मंगलबार सामाजिक सञ्जालमार्फत एसियाली खेलकुदको पुरुष क्रिकेटमा नेपालले मंगोलिया र माल्दिभ्सविरुद्ध कीर्तिमानी जित निकालेको र भारतविरुद्ध उत्कृष्ट प्रदर्शन गरेका बताउँदै टिमलाई बधाईसहित धन्यवाद दिए ।

“१९औँ एसियाली खेलकुद प्रतियोगितामा मंगोलिया र माल्दिभ्ससँगको प्रतिस्पर्धामा कीर्तिमानसहित प्राप्त गरेको सफलताप्रति हार्दिक बधाई । साथै, आज बिहान भारतसँग भएको खेलमा उत्कृष्ट प्रदर्शनका लागि नेपाली क्रिकेट टिमलाई हार्दिक धन्यवाद व्यक्त गर्दछु,” प्रचण्डले सामाजिक सञ्जालमा लेखेका छन् ।

नेपाली टिम मंगलबार चीनको झेजाङ प्राविधिक विश्वविद्यालयको खेल मैदानमा भारतसँग २३ रनले पराजित हुँदै पुरुष क्रिकेटको क्वार्टरफाइनलबाट बाहिरिएको थियो । भारतले प्रस्तुत गरेको २०३ रनको लक्ष्य पछ्याउने क्रममा नेपाली टिमले निर्धारित २० ओभरमा नौ विकेट गुमाएर १७९ रन बनाएको थियो ।