काठमाडौं । नेपाल चिकित्सक संघले आज काठमाडौं मेडिकल कलेज (केएमसी)को नेफ्रोलोजी ओपीडीमा कार्यरत इन्टर्न चिकित्सक मनिष खड्कामाथि आक्रमण गर्नेलाई तत्काल कारबाही गर्न माग गरेको छ ।

"हिजो मात्र नेपाल सरकारसँग गरिएको सम्झौता मसी सुक्न नपाउँदै आज स्वास्थ्य सेवा प्रवाहका लागि खटिएको अवस्थामा चिकित्सकमाथि गरिएको अत्यन्तै अमानवीय र कायर भौतिक आक्रमणको जति निन्दा गरे पनि कमै हुन्छ," आइतबार साँझ एक विज्ञप्तिमार्फत संघले भनेको छ ।

संघले स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन २०६६ (पहिलो संशोधनसहित) र संघसँग गएको भदौ ३१ गते भएको सम्झौताबमोजिम कडा कारबाही गर्न माग गरेको छ ।

साथै संघले काठमाडौं मेडिकल कलेजमा कार्यरत चिकित्सकहरूको विरोधमा ऐक्यबद्धता जनाएको छ । 

आज दिउँसो सिनामंगलस्थित केएमसी अस्पतालमा खड्कामाथि कुटपिट भएको थियो । अस्पताल प्रबन्धक नारायणप्रसाद दाहालका अनुसार ओपीडीमा परीक्षणका लागि आएका दुईजनामध्ये एकजनाले चिकित्सकमाथि दिउँसो १२ बजेतिर कुटपिट गरेका थिए ।

कुटपिटमा संलग्न गुल्मीका २२ वर्षीय रुपक गौतम र गुल्मीकै ३४ वर्षीय सरोज गौतमलाई गौशाला प्रहरीले पक्राउ गरेको छ ।

शनिबार साँझ मात्रै चिकित्सकमाथि कुटपिटविरुद्ध आन्दोलनरत चिकित्सक समूह र सरकारबीच ६ बुँदे सहमति भएको थियो । जसअनुसार चिकित्सकहरूको असोज ९ गतेदेखिको आन्दोलन फिर्ता भएको थियो ।