काठमाडौं । सुन तस्करी प्रकरणको छानबिनका लागि तीन सदस्यीय समिति बनाइने भएको छ । आइतबार बालुवाटारमा बसेको राष्ट्रिय मान्यताप्राप्त दलहरूको बैठकमा समिति बनाउने सहमति भएको हो ।

उच्च अदालतका पूर्वन्यायाधीशको नेतृत्वमा आयोग बनाउने सहमति भएको छ । आयोगको समयावधि तीन महिना रहने नेकपा (एमाले)का सचेतक महेश बर्तौलाले जानकारी दिए ।

आज बस्ने मन्त्रिपरिषद्को बैठकबाट आयोगका सदस्यहरूबारे निर्णय गरिने नेकपा (माओवादी केन्द्र) सचेतक हितराज पाण्डेले जानकारी दिए । 

उनका अनुसार, आजै बस्ने प्रतिनिधिसभा बैठकमा प्रधानमन्त्री पुष्पकमल दाहाल 'प्रचण्ड'ले अमेरिका र चीन भ्रमणसहितको विषयमा बोल्नेछन् ।