काठमाडौं । नेपाली कांग्रेसकी नेतृ चित्रलेखा यादवले कसैले नपाउने र पहुँचवालाहरूको क्षेत्रमा बजेट फालाफाल हुने कुरा नै समावेशी राजनीति हो भन्दै प्रश्न गरेकी छन् । 

बीपी साहित्य महोत्सवका अवसरमा पार्टी केन्द्रीय कार्यालय सानेपामा आयोजित कार्यक्रमको ‘समावेशिता, सामाजिक रूपान्तरण र बीपी’ सेसनमा बुधबार उनले बीपीको सपनाअनुसार चल्न नसकेको बताइन् । 

“पहुँचवालाहरू जो देशको प्रधानमन्त्री भयो उसको क्षेत्रमा बजेट फालाफाल हुने । जसको पहुँच छैन त्यहाँ केही पनि नहुने । यहीँ हो समावेशी राजनीति ? यहीँ हो सामाजिक रुपान्तरण ? बीपीको सपना यहीँ थियो त ?,” उनले प्रश्न गरिन् । 

बाह्रखरीका विशेष सम्पादक हरिबहादुर थापाले सहजीकरण गरेको कार्यक्रममा उनले युवा शक्ति बीपीको सपना भएको स्मरण गरिन् । तर, युवाहरू विदेश पठाउनुपर्दा दुःख लागेको बताइन् । 

“उहाँले बलियो युवा शक्तिको कल्पना गर्नुभएको थियो । आज ती युवा शक्तिहरू कहाँ छन् ? सबै निर्यात भएका छन् । नेपाल युवा शक्ति निर्यात गर्ने देशको रूपमा चिनिन्छ । दुःख लाग्छ,” उनले भनिन् । 

कांग्रेसभित्र समस्या पहिचान गरे काम गर्न सक्ने नेता एक सय एक रहेको सुनाइन् । 

“समाजका सबै समस्यालाई पहिचान गरी समाधान गरेर राष्ट्रलाई सुखी सम्पन्न बनाउन सकिन्छ भनेर काम गर्नु समयको माग रहेको छ,” यादवले भनिन् ।