काठमाडौं । रोयल इन्फिल्डको दुई नयाँ मोटरसाइकल सार्वजनिक भएका छन् । 

रोयल इन्फिल्डको नेपालका लागि आधिकारिक बिक्रेता अल्फा अटोमोटिभले भृकुटीमण्डपमा जारी नाडा अटो सोमा सार्वजनिक गरेको हो । रोयल इन्फिल्ड क्लासिक ३५० सीसी डार्कएडिसन र क्लासिक ३५० सीसी क्रोमएडिसन सार्वजनिक गरेको हो ।

कम्पनीले क्लासिक ३५० सीसी डार्कएडिसनको मूल्य पाँच लाख २५ हजार रुपैयाँ र क्रोमएडिसनको मूल्य पाँच लाख ३० हजार रुपैयाँ तोकेको छ । दुवै भेरियन्टको बुकिङसमेत खुलिसकेको कम्पनीले जानकारी दिएको छ ।

दुवै मोटरसाइकलमा डुअल डिस्कब्रेक छ भने स्पीड सेन्सर पनि राखिएको जानकारी दिइएको छ । यी मोटरसाइकलमा किक स्टार्ट हटाएर सेल्फ स्टार्ट सिस्टम राखिएको बताइएको छ । अन्य फिचरहरू केही परिवर्तन नगरी पुरानै यथावत् राखेको पनि जानकारी दिइएको छ ।

यी मोटरसाइकलमा ३४९ सीसी सिंगल सिलिन्डर, फ्युल इन्जेक्टेड फोर स्ट्रोक, एयर–ओयल कुल्ड, एसआएचसी एफआई रहेको छ । उक्त इन्जिनले अधिकतम ६१०० आरपीएममा २०.४८ बे्रकहर्स पावर र चार हजार आरपीएममा २७ एनएमको टर्क जेनेरेट गर्ने पनि बताइएको छ ।

टाइमलेस स्टाइलिङ डिजाइनमा रहेको यी मोटरसाइकलमा हेलोजन लाइट, एनालग डिजिटल इन्स्ट्रुमेन्ट मिटर, यूएसबी चार्जिङ पोर्ट फिचरहरू रहेका छन् ।

त्यस्तै लामो मेटल एग्जस्ट, वाइडर सीट, वाइडर टायर, ट्युबलेस टायर, स्पीड सेन्सर, टेलिस्कोपिक सस्पेन्स र ट्वीन सक अब्जर्बार जस्ता फिचरहरू पाउन सकिन्छ ।