काठमाडौं । अर्थमन्त्री डा. प्रकाशशरण महतले सरकारले १२ कक्षा पास गर्ने बित्तिकै विदेश जाने पद्धति रोक्नुपर्ने आवश्यकता देखिएको बताएका छन् । बुधबार काठमाडौंमा आयोजित एक कार्यक्रममा अर्थमन्त्री महतले पछिल्लो समय १२ कक्षा पास गर्न नपाउँदै विदेश जाने पद्धतिको विकास भएको भन्दै सरकारले रोक्ने अभियान चलाउनुपर्ने बताए । 

महतले विदेशमा गएपछि सबै समस्या हल हुने गरी शैक्षिक परामर्श केन्द्रहरूले प्रचार गरेको पनि बताए । आफू पनि विदेशमा बसेर आएकाले विदेशमा भनेको जस्तो सहज अवस्था नभएको उनको भनाइ छ ।

अर्थमन्त्री महतले नेपालमा नै धेरै श्रमशक्तिको आवश्यकता रहेको भए पनि विदेश जाने पद्धतिले समस्या निम्त्याएको दाबी गरे । उनले सरकाले नेपालको शिक्षा प्रणालीलाई सुधार गर्न आवश्यक रहेको पनि बताए ।

उनले नेपालमा नम्बरका आधारमा धेरै विश्व विद्यालयहरू खोल्ने डिन र भीसी बन्ने तर विद्यार्थीको शिक्षामा गुणस्तर वृद्धि नगर्ने अवस्था रहेको भन्दै अब सरकारले लगानी गरेर शिक्षा प्रणाली सुधार गर्ने बताए । 

उनले सरकारसँग स्रोत कम भएकाले पर्याप्त बजेट व्यवस्थापन गर्न सके आगामी दिनमा शिक्षा क्षेत्रमा सुधार आउने विश्वास रहेको बताए । उनले देशको आर्थिक स्रोत कम रहेको तर आवश्यकताहरू धेरै रहेको उल्लेख गर्दै सबै मागहरूलाई सरकारले एकैपटक पूरा गर्न सक्ने बताए ।