काठमाडौं । विवादास्पद गोलले मान्यता पाउँदा अन्तर्राष्ट्रिय मैत्रीपूर्ण फुटबलमा नेपालले म्यानमारसँग १–० को हार बेहोरेको छ । 

म्यानमारको थुवुन्न रंगशालामा सम्पन्न खेलको ८६औँ मिनेटमा विन नाइङ्ग तुनले गरेको विवादास्पद गोललाई रेफ्रीले मान्यता दिँदा नेपालले हार बेहोरेको हो ।

बल म्यानमारको पेनाल्टी बक्समा रहँदा लाइन्समेनले नेपाली खेलाडी अफसाइड रहेको जनाउँदै झन्डा उठाएका थिए । तर, लाइन्समेनको यो इशारालाई मैदानका रेफ्रीले नदेख्दा म्यानमारका रक्षकले क्लियर गरेको बल काउन्टरमा म्यानमारले गोल गरेको थियो । लाइन्समेनको इशारालाई नदेखेपछि नेपाली टिमका कप्तान किरणसहित सबै सदस्य गोल खारेजीका लागि रेफ्रीसँग विवादमा उत्रिएका थिए । 

खेलभर निरन्तर आक्रमण बुनेको नेपालले करिब आधा दर्जन गोलका सुन्दर मौका सदुपयोग गर्न सकेको थिएन ।

विश्वकप छनोटको पहिलो चरणअघि नेपालले तयारीका लागि म्यानमारसँग दुई मैत्रीपूर्ण फुटबल खेलेको हो । यसअघि पहिलो खेलमा नेपालले म्यानमारलाई गोलरहित बराबरीमा रोकेको थियो ।