विराटनगर । सर्वोच्च अदालतको परमादेश दिएपछि नेकपा (एमाले) कोसी प्रदेश संसदीय दलका नेता हिक्मत कार्की आज साँझ मुख्यमन्त्री नियुक्त हुँदै छन् । सर्वोच्चले बिहीबार उद्धव थापा नेतृत्वको सरकारलाई बर्खास्त गरी कार्कीलाई संविधानको धारा १६८ को उपधारा ३ बमोजिम ४८ घण्टाभित्र मुख्यमन्त्री नियुक्त गर्न आदेश दिएको थियो ।

प्रदेश प्रमुख पर्शुराम खापुङले शुक्रबार साँझ कार्कीलाई मुख्यमन्त्री नियुक्त गरी शपथ गराउने तय भएको छ ।

प्रदेश प्रमुखकको कार्यालयले दिएको जानकारीअनुसार मुख्यमन्त्री नियुक्त गरी आजै शपथ खुवाउने तयारी भएको कार्यालयका निमित सचिव नरेन्द्र श्रेष्ठले बताए । कार्कीले एमाले सांसद तिलकुमार मेन्याङ्बो र एकराज कार्कीलाई मन्त्रीमा नियुक्त गर्ने तयारी गरेका छन् । 

मुख्यमन्त्री नियुक्त भएको ३० दिनभित्र कार्कीले प्रदेश सभाबाट विश्वासको मत लिनुपर्ने छ । गत असार १५ गते कार्कीले विश्वासको मत प्राप्त गर्न नसकेपछि एमाले नेतृत्वको सरकार ढलेको थियो । त्यसबेला सत्ता साझेदार दल माओवादी र जसपाले उनलाई दिएको समर्थन फिर्ता लिएका थिए ।  

कोसी प्रदेश सभा ९३ सदस्यीय छ । एमालेका ४० (उपसभामुखसहित), कांग्रेसका २९, नेकपा (माओवादी केन्द्र), राष्ट्रिय प्रजातन्त्र पार्टी (राप्रपा) का छ, नेकपा (एकीकृत समाजवादी) का चार र जनता समाजवादी पार्टी (जसपा) एक सांसद छन् । राप्रपा एमालेसँगको गठबन्धनमा छ ।