काठमाडौं । नेकपा (एमाले)का सांसद योगेश भट्टराईले आर्थिक कार्यविधि ऐनमा समस्या भए संशोधन गर्नुपर्ने बताएका छन् ।
मंगलबार बसेको लेखा समितिको बैठकमा उनले राष्ट्रिय मान्यताप्राप्त दलहरू पारदर्शी र जवाफदेही बन्नुपर्ने बताए । समितिले दलको खर्चको स्रोत पनि हेनुपर्ने उनले बताए ।
“समितिले राष्ट्रिय मान्यता प्राप्त दलहरूको लेखा हेर्नुपर्छ, खोज्नुपर्छ । राजनीतिक दलको ऐन पनि हेर्नुपर्छ,” भट्टराईले भने, “कहाँबाट स्रोत आयो, खर्च आयो, खर्च कसरी भइरहेको छ, कहाँबाट चलेको छ हेर्नुपर्छ ।”
सम्बन्धित दलबाट मन्त्री बनेकाहरूको मन्त्रालयको बेरूजु सम्बन्धित दलमा पठाउनुपर्ने र पुनः मन्त्री बन्ने÷नबन्ने, टिकट दिने÷नदिने सम्बन्धित दलले निर्णय गर्ने उनको भनाइ छ ।
भट्टराईले रिटायर भएका व्यक्ति संवैधानिक अंगमा जाँदा पनि ध्यान दिन उनको सुझाव छ ।
“कुनै सचिव रिटायर भएपछि संवैधानिक अंगमा जान्छ । उसको कार्यकालमा बेरूजु छ, भ्रष्टाचार भएको छ, अनि उ अख्तियार प्रमुख भएर जान्छ । यो मिल्दैन यसमा पनि ध्यान दिनुपर्छ,” उनले भने ।
उनले लेखा सुशासनसँग जोडिएको समिति भएकाले आवश्यक परे कारबाही गर्नेसम्मको सिफारिस र निर्देशन दिइनुपर्ने बताए ।
