काठमाडौं । नेपालमा डेंगी संक्रमण बढिरहेको छ । इपिडिमियोलोजी तथा रोग नियन्त्रण महाशाखाले सार्वजनिक गरेको तथ्यांकानुसार हालसम्म २१ हजार २०६ जनामा डेंगी संक्रमण पुष्टि भएको छ ।

महाशाखाले भदौ र असोजमा डेंगी संक्रमण उच्च हुने प्रक्षेपण गरेको थियो । संक्रमणका कारण १३ जनाको मृत्यु भएको छ ।

महाशाखाका निर्देशक डा. रुद्रप्रसाद मरासनीले पानी परिरहेकाले डेंगी संक्रमण दैनिक रूपमा बढेको बताए ।

नेपालमा पहिलोपटक सन् २००४ मा एकजनामा डेंगी देखिएको थियो । २०२२ मा ५४ हजार ७८४ मा संक्रमण र ८८ जनाको मृत्यु भएको थियो ।

सुनसरीमा मात्र ११ हजार संक्रमित
सुनसरी जिल्लामा सबैभन्दा बढी संक्रमण देखिएको छ । महाशाखाका अनुसार सुनसरीमा ११ हजार ६५९ जनामा डेंगी सङ्क्रमण देखिएको छ ।

सुनसरीपछि मोरङमा दुई हजार २४२, धादिङमा दुई हजार १०१, झापामा एक हजार ३२३, काठमाडौंमा ४२७, धनकुटामा ३३६, संखुवासभामा २७२, कास्कीमा २६०, दार्चुलामा १९४ र ललितपुरमा १७४ जना डेंगीका बिरामी भेटिएका छन् ।

पानी जम्ने सफा ठाउँमा ‘एडिज एजिप्टी र एडिस एल्बोपिक्टस’ प्रजातिको लामखुट्टेले फुल पार्छ । फुलबाट लार्भा निस्कन्छ र लार्भा वयस्क भएर टोकेपछि डेंगी रोग लाग्छ । रासस