काठमाडौं । अर्थमन्त्री डा. प्रकाशशरण महतले सरकार आर्थिक गतिविधि चलायमान बनाउन बाधक बनेका समस्या समाधान गर्नेतर्फ लागिरहेको बताएका छन् । शनिबार काठमाडौंमा नेपाल आर्थिक पत्रकार समाजको २५औँ साधारणसभामा उनले यस्तो बताएका हुन् ।

देशको आर्थिक अवस्था सुधार गर्न सबैले आफ्नो ठाउँबाट सहयोग गर्नुपर्नेमा उनले जोड दिए । उनले अहिले नेपालमा पर्यटकको चाप बढेको र विदेशी मुद्राको सञ्चिति पर्याप्त रहेको उल्लेख गरे ।

गत वर्षको तुलनामा राजस्व पनि वृद्धि भइरहेको उनको भनाइ छ । “...अहिले पर्यटकको फ्लो बढिरहेको छ । हाम्रो विदेशी मुद्राको सञ्चिति काफी छ । अरू आर्थिक गतिविधि अघि बढाउनको लागि जुनखाले लिमिटेसन वा समस्याहरू छन्, ती समस्यालाई समाधान गर्नेतर्फ हामी लागिरहेका छौँ,” अर्थमन्त्री डा. महतले भने, “आगामी दिनमा अर्थतन्त्र पोजिटिभ स्थितिमा जान्छ । राजस्व पनि पोहोर सालको तुलनामा प्रगतिमा छौँ । आउने दिनमा झनै प्रगति हुने विश्वास छ ।”

कार्यक्रममा नेपाल उद्योग वाणिज्य महसंघका अध्यक्ष चन्द्रप्रसाद ढकालले निजी क्षेत्रले दिने सुझावलाई बेवास्ता गर्दा देशको अर्थतन्त्र अहिलेको अवस्थामा आएको बताए । अर्थतन्त्रबारे नकारात्मक टिप्पणी गरिरहँदा लगानीकर्ताको मनोबल खस्किएको उनले सुनाए । उनले सरकारी निकायबीच समन्वयको कमी हुँदा पनि अर्थतन्त्रमा धेरै असर परेको बताए ।

नेपाल चेम्बर अफ कमर्सका अध्यक्ष राजेन्द्र मल्लले मुलुकको अर्थतन्त्र अहिले खस्किएकै अवस्थामा रहेको जिकिर गरे । उनले अर्थतन्त्रलाई सही ‘ट्रयाक’मा लैजान नेपाल राष्ट्र बैंक, नेपाल धितोपत्र बोर्ड, बिमा प्राधिकरणलगायत निकायले गरेका निर्णयलाई सरकारले सच्याउनुपर्नेमा जोड दिए ।