काठमाडौं । इटालीका रोबर्टो मान्सिनी साउदी अरेबियाको मुख्य प्रशिक्षकमा नियुक्त भएका छन् । इटाली फुटबल टिमको मुख्य प्रशिक्षण छोडेको दुई हप्तापछि साउदीले मान्सिनीलाई अनुबन्ध गरेको हो ।

५८ वर्षीय मान्सिनीले इटालीलाई युरोपियन च्याम्पियनसिप–२०२० को उपाधि दिलाएका थिए । त्यस बेला इटालीले च्याम्पियनसिपको फाइनलमा इंग्ल्यान्डलाई पेनाल्टी सुटआउटमा हराएको थियो ।

मान्सिनीको प्रशिक्षणमा इटालीले कीर्तिमानी ३७ खेलसम्म अपराजित यात्रा कायम राखेको थियो । फिफा विश्वकपमा भने छनोट हुन सकेको थिएन ।

मान्सिनीले साउदी अरेबियासँग सन् २०२७ सम्मको सम्झौता गरेका छन् । मान्सिनीको प्रशिक्षणमा साउदीले आउँदो सेप्टेम्बर ९ मा कोस्टा रिकाविरुद्ध पहिलो खेल खेल्नेछ ।

“नयाँ देशमा र विशेष गरी एसियामा फुटबलको विकास हुँदै गरेको देशमा प्रशिक्षण गर्न पाउनु मेरो लागि राम्रो अवसर हो भन्ने विश्वास लिएको छु । साउदी प्रो लिगमा उच्चस्तरका खेलाडीको उपस्थितिले यहाँको राष्ट्रिय फुटबल विकासको सम्भावनालाई दर्साउँछ,” सम्झौतापछि माल्दिनीले भने ।

गत वर्ष कतारमा सम्पन्न फिफा विश्वकपमा हर्भ रेनार्डको प्रशिक्षणमा साउदीले अर्जेन्टिनालाई २–१ ले हराउँदै सनसनी मच्चाएको थियो । तर, समूह चरण पार गर्न सकेको थिएन । विश्वकपपछि रेनार्डले साउदीको जिम्मेवारी छोडेका थिए ।