काठमाडौं । महोत्तरीको जलेश्‍वर नगरपालिका–९, प्रकौली चोकमा आज बसको ठक्करबाट मोटरसाइकल चालकको मृत्यु भएको छ ।

मृत्यु हुनेमा स्थानीय ३५ वर्षीय सन्तोष यादव रहेका छन् । दुर्घटनामा गम्भीर घाइते भएका यादवलाई उपचारको लागिप्रादेशिक अस्पताल जलेश्वर पुर्‍याउनासाथ चिकित्सकले मृत घोषणा गरेका थिए । 

मिथिला इन्सिच्युट अफ टेक्नोलोजी स्कुल जनकपुरको बा २ क १५३६ नम्बरको बसले ज ८ प ९२६७ नम्बरको मोटरसाइकललाई आज दिउँसो सवा १२ बजे ठक्कर दिएको थियो ।

दुर्घटनामा संलग्न बस नियन्त्रणमा रहेको र चालक फरार रहेकाले खोजी भइरहेको जिल्ला कार्यालय महोत्तरीले जनाएको छ ।