काठमाडौं । पूर्वमन्त्री एवं तत्कालीन काठमाडौं नगरपालिकाका मेयर पीएल सिंहलाई पुनः अस्पतालमा भर्ना गरिएको छ । सिंहका भाइ इन्द्रलालका अनुसार रगत बान्ता हुन थालेपछि सिंहलाई ललितपुरस्थित मेडिसिटी अस्पतालमा पुर्‍याइएको हो । उनलाई आईसीयूमा राखेर उपचार थालिएको छ ।

यसअघि पनि यस्तै समस्या देखिएपछि मेडिसिटीमै सिंहको अपरेसन गरिएको थियो । आन्द्रामा रगत भरिएका कारण अपरेसन गर्नुपरेको थियो । अपरेसनपछि रगतको कमी भएका कारण सिंहलाई २१ पिन्ट रगत दिनुपरेको थियो ।

भाइ इन्द्रलालका अनुसार त्यसपछि घरैमा आराम गरिरहेका सिंहले ठोस खाना खान थालिसकेका थिए । तर, आज फेरि स्वास्थ्यमा समस्या बल्झिएको हो ।

“आज बिहान एक्कासि फेरि ब्लड भमिट भयो र अस्पताल ल्याएका छौँ,” इन्द्रलालले बाह्रखरीसित भने, “उहाँ अस्पताल ल्याउँदासम्म होसमै हुनुहुन्छ । अहिले आईसीयूमा राखेर उपचार हुँदै छ । हामीले भेट्न पाएका छैनौँ ।”