काठमाडौं । सशस्त्र प्रहरीले नेपालबाट बच्चा चोरेर भारतर्तफ लैजान लागेका एकजनालाई नियन्त्रणमा लिएको छ । बाराको देवताल गाउँपालिका–३ अमुवाबाट दुईजना बच्चालाई बोरामा राखेर भारततर्फ लैजाँदै गरेको अवस्थामा भारतको पूर्वीचम्पारण मुर्तिया ग्रामपन्चायत–४ आधारपुर घर भएका २२ वर्षीय ताबरेज आलमलाई नियन्त्रणमा लिइएको हो । 

सशस्त्र प्रहरीका अनुसार देवतालस्थित नन्की अमुवा बस्ने शिवपुजन महतोकी ९ महिनाकी छोरी लक्ष्मी महतो र प्रेमचन्द महतोका २ वर्षीय छोरा सत्यमकुमार महतोलाई आलमले चोरी गरी बोरामा हालेर भारततर्फ लैजाँदै थिए । 

सीमावर्ती इलाकामा गस्तीमा खटिएको सशस्त्र प्रहरीले शंका लागेर आलमले बोकेको बोरा जाँच गर्दा दुईवटा बच्चा फेला परेपछि उनलाई नियन्त्रणमा लिइएको हो । 

उद्धार गरिएका बच्चाहरूलाई अभिभावकको जिम्मा लगाइएको छ । नियन्त्रणमा लिइएका आलमलाई आवश्यक कारवाहीको लागि स्थानीय प्रहरीमा बुझाइएको डीएसपी शैलेन्द्र थापाले जानकारी दिए ।