काठमाडौं । भारतको कास्मिरको पहलगामस्थित बैसारन उपत्यकामा भारतीय पर्यटकमाथि भएको हमलामा मृत्यु हुनेको  संख्या २८ पुगेको छ । 

टाइम्स अफ इन्डियाका अनुसार उक्त हमला पहलगामबाट ५ किलोमिटर टाढा बैसारन उपत्यकामा भएको बताइएको छ । जम्मू र कास्मिर प्रहरीका निरीक्षक महानिर्देशक विदीकुमार बिर्डीले बीबीसी हिन्दीलाई बताएअनुसार हमला भएको क्षेत्रसम्म प्रहरी अझै पुग्न सकेको छैन । 

यो हमलाबारे अहिलेसम्म कुनै समूहले पनि जिम्मा लिएको छैन । 

भारतको गुजरातबाट आएका एक प्रत्यक्षदर्शी पर्यटकले बताए अनुसार अचानक भएको हमलापछि आतंक मच्चिएको थियो । 

हमलापछि साउदी अरबको यात्रा छोट्याएर भारतीय प्रधानमन्त्री नरेन्द्र मोदी मंगलबार राति नै स्वेदेश फर्किएको टाइम्स अफ  इन्डियाले जनाएको छ । पूर्वनिर्धारित समयअनुसार उनी बुधबार रातिमात्र फर्किने योजना थियो ।

कास्मिर हमलापछि मोदीले दोषीलाई कानुनको दायरामा ल्याइने बताउँदै आतंकवादविरुद्ध आफू अडिग रहेको दोहोर्‍याएका छन् । 

यसअघि आक्रमण लगत्तै भारतका गृहमन्त्री अमित शाहले मंगलबार आपतकालीन सुरक्षा बैठक गर्न कास्मिरको श्रीनगर पुगेका थिए । 

उक्त हमलाको घटनालाई लिएर अमेरिकी राष्ट्रपति डोनाल्ड ट्रम्प, रूसी राष्ट्रपति भ्लादिमिर पुटिन र युरोपेली युनियनकी प्रमुख उर्सुला भोन डर लेयेनलगायत विश्वभरका नेताहरूले निन्दा गरेका छन् ।

सामाजिक संजालमा पोस्ट गर्दे ट्रम्पले कास्मिरबाट अत्यन्त चिन्ताजनक खबर आएको र आतंकवादविरुद्धको लडाइँमा अमेरिका भारतको साथ उभिएको बताएका छन् । 

युरोपेली युनियनकी प्रमुख भोन डर लेयेनले यसलाई निकृष्ट आतंकवादी हमला भनेकी छिन् । रूसी राष्ट्रपति पुटिनले यसलाई क्रुर अपराध भन्दै शोक सन्देश पठाएको बीबीसीले जनाएको छ ।