काठमाडौं । नेकपा (एमाले)को लुम्बिनी प्रदेश अधिवेशनको तयारी सुरु भएको छ । अधिवेशन आगामी भदौ १६ र १७ गते बुटवलको अन्तर्राष्ट्रिय सम्मेलन केन्द्रमा हुनेछ ।

एमालेको अधिवेशनको सुरुआत लुम्बिनीबाट हुन लागेको हो । अधिवेशनको आवश्यक तयारी भइरहेको लुम्बिनी प्रदेश अध्यक्ष राधाकृष्ण कँडेलले जानकारी दिए ।  

अधिवेशनको तयारी स्वरुप आवास, खाद्य, स्वास्थ्य लगायतका क्षेत्रको संयोजक तोकिएको र केही समिति पनि निर्माण गरिएको छ । उनका अनुसार भदौ ९ गते प्रतिनिधि छनोट हुनेछ । अधिवेशनका लागि एक हजार आसपास प्रतिनिधि चयन हुने कँडेलले बताए ।

“ठ्याक्कै हिसाब निकालेका छैनौं । एक हजारको सेरोफेरोमा प्रतिनिधि छनोट हुनेछन् । प्रतिनिधि छनोटको मुख्य केन्द्र पालिकालाई बनाइने छ,” उनले बाह्रखरीसँग भने ।

प्रतिनिधिले बस्ने व्यवस्था आफैँ गर्नुपर्नेछ । कँडेलका अनुसार खाने व्यवस्था भने अधिवेशन स्थलमा नै गरिने छ ।  अधिवेशनको उद्घाटन पार्टीका केन्द्रीय अध्यक्ष तथा पूर्वप्रधानमन्त्री केपी शर्मा ओलीले गर्नेछन् ।

१६ हजार सदस्य घटे
लुम्बिनीमा एमालेको संगठीत सदस्य घटेका छन् । विगतको तुलनामा झण्डै १६ हजार सदस्यले सदस्यता नवीकरण गरेनन् ।

हाल ८२ हजार ३१२ जनाले नवीकरण गरेका छन् । जुन सदस्यता नवीकरण पार्टी केन्द्रीय संगठन विभागले गरेर पठाएको उनले जानकारी दिए । यसअघि ९८ हजार सदस्य रहेको उनको भनाइ छ ।

“पहिले ९८ हजार सदस्य थिए । पार्टीबाट यताउता जाने कुरा भए । कोहीको मृत्यु भयो । विविध कारणले त्यति स्वतः घट्ने पनि भयो नि,” कँडेल भन्छन् ।

अध्यक्षमा दोहोरिने चाहना
हालका अध्यक्ष कँडेलले फेरि अध्यक्ष बन्ने चाहना व्यक्त गरेका छन् । उनले पार्टीमा छलफल गर्न बाँकी रहेको सुनाए ।

“साथीहरूसँग सल्लाह बाँकी छ । अन्तरिम कालजस्तो अध्यक्ष भएको हुँ । नेता कार्यकर्ताकाहरूको इच्छा भयो भने म पनि रहन्छु,” उनी भन्छन् ।

अधिवेशनबाट पदाधिकारी सर्वसम्मत चयन हुने सम्भावना रहेको उनको भनाइ छ ।

“सर्वसम्मत हुने सम्भावना पनि छ । भोटिङ भए पनि लोकतान्त्रिक अभ्यास हो । के समस्या होला र ?,” कँडेल भन्छन् ।