काठमाडौं । अविरल वर्षासँगै पहिरो खसेपछि बीपी राजमार्ग अवरुद्ध भएको छ । सिन्धुलीको सुनकोसी गाउँपालिका–२, कमेरेफाँटस्थित बीपी राजमार्गमा सडक अवरुद्ध भएको प्रहरीले जनाएको छ ।

सो स्थानमा आज बिहान करिब सवा १ बजे पहिरो खस्दा सडक अवरुद्ध भएको थियो । बिहान करिब सवा ४ बजे बाटो एकतर्फी खुलाइएको थियो । तर, बिहान करिब ६ बजेर २० मिनेटदेखि सडक पुनः दुईतर्फी अवरुद्ध भएको वाग्मती प्रदेश प्रहरी कार्यालयले जानकारी दिएको छ ।

सडकमाथिबाट ढुंगामाटोसहितको लेदो झरेर सडक अवरुद्ध भएको सो कार्यालयले जनाएको छ । प्रहरीका अनुसार सडक खुलाउने प्रयास भइरहेको छ ।