विराटनगर । विराटनगर महानगरपालिकाका एक युवकमाथि गोली हानी हत्या गरेको आरोपमा थप दुईजना पक्राउ परेका छन् ।

सुनसरीको धरानस्थित चारकोसे जंगलमा विराटनगर–५ का रोहित चौधरीमाथि गोली प्रहार गरेको आरोपमा थप दुईजनालाई प्रहरीले पक्राउ गरेको हो ।

पक्राउ पर्नेमा धरानका प्रकाश लिम्बू र विराटनगरका अज्जु भनिने अजय शर्मा छन् । गएको बिहीबार धरान र विराटनगरबाट उनीहरूलाई पक्राउ गरिएको जिल्ला प्रहरी कार्यालय सुनसरीका प्रमुख एवं एसपी प्रभु ढकालले जानकारी दिए ।

हत्यामा प्रयोग गरिएको बन्दुक विराटनगरका शर्माले उपलब्ध गराएको अनुसन्धानका क्रममा खुलेको प्रहरीले जनाएको छ ।

सोही घटनामा यसअघि पक्राउ परेका मोरङको लेटाङ नगरपालिका–१ का दीपक तिम्सिना र धरान उपमहानगरपालिका–१४ का अनशन तामाङलाई कोसी प्रदेश प्रहरी कार्यालयले दुई दिनअघि सार्वजनिक गरेको थियो ।

यही साउन ५ गते धनकुटाको मूलघाटबाट विराटनगर फर्कने क्रममा पानी पिउन रोकिएका बेला चारकोसे जंगलमा चौधरीमाथि आक्रमण गरिएको थियो । सुनको सिक्री, मोबाइल र पैसा लुटेर उनीहरू भागेका थिए ।

घटनाका मुख्य नाइके भनिएका तिम्सिनाले गोली प्रहार गरेका थिए । चौधरीको उपचारका क्रममा धरानस्थित बीपी कोइराला स्वास्थ्य विज्ञान प्रतिष्ठानमा मृत्यु भएको थियो ।

प्रहरीका अनुसार पक्राउ परेका तिम्सिना जबरजस्ती करणी मुद्दामा १० वर्ष कैद भुक्तान गरेर केही समयअघि छुटेका थिए । तामाङ लागुऔषध मुद्दामा ६ महिना कैद भुक्तान गरेका व्यक्ति हुन् ।