काठमाडौं । नेपाल उद्योग वाणिज्य महासंघले निर्माण व्यवसायीका जायज माग सम्बोधन गर्न सरकारलाई आग्रह गरेको छ ।

नेपाल निर्माण व्यवसायी महासंघको आन्दोलनप्रति ध्यानाकर्षण गराउँदै महासंघले यस विषयमा सरकार गम्भीर हुनुपर्ने जनाएको हो । निर्माण क्षेत्रका जायज माग सरकारले सुनुवाइ नगरेको भन्दै यसले अर्थतन्त्रमा नै समस्या पर्ने विज्ञप्तिमार्फत जानकारी दिएको छ ।

“कुल गार्हस्थ उत्पादनमा ठूलो योगदान रहेको यस क्षेत्रका जायज माग सुनुवाइमा भइरहेको ढिलाइले निर्माण मात्र नभइ अर्थतन्त्रमा नै समस्या पर्ने देखिएको छ । व्यवसायीले निर्माण कार्य सम्पन्न गरे पनि भुक्तानी नहुँदा वित्तीय प्रणाली र समग्र अर्थतन्त्रमा नै नकारात्मक प्रभाव परेकोले त्यसतर्पm सरकार संवेदनशील हुनु जरुरी छ,” विज्ञप्तिमा उल्लेख छ ।

विकास निर्माण र सर्वसाधारणको जीवनयापनसँग समेत जोडिएका परियोजना रोकिदा सरकारको पुँजीगत खर्च हुन नसकेको महासंघको ठहर छ ।

निर्माण, उद्योग र थोक व्यापार नकारात्मक रहँदा अर्थतन्त्र मन्दीमा गएको भन्दै यसबाट बैंक वित्तीय संस्था, सिमेन्ट, छड जस्ता निर्माण सामाग्री उत्पादक र सरकारको राजस्वमा पनि गम्भीर असर परेको महासंघले जनाएको छ ।