काठमाडौं । समूह चरणको आफ्नो अन्तिम खेलमा चीनविरुद्ध ६–१ को सहज जित निकाल्दै इङ्ल्यान्ड समूह विजेताको रूपमा फिफा महिला विश्वकपको अन्तिम–१६ मा प्रवेश गरेको छ ।

मंगलबार अस्ट्रेलियाको एडिलेडस्थित हिन्दमार्श रंशालामा इङ्ल्यान्डलाई जित दिलाउन लोरेन जेम्सले दुई गोल गरिन् । यस्तै, एलिसिया रुसो, लोरेन हेम्प, क्लो केली र राचेल डेलीले समान एक गोल गरे । चीनका लागि वाङ्ग सुआङ्गले एक गोल फर्काएकी थिईन् ।

खेलको पाँचौँ मिनेटमा रुसोको गोलमार्फत इङ्ल्यान्डले अग्रता लिएको थियो । २६औँ मिनेटमा हेम्पले टोलीको अग्रता दोब्बर बनाइन् ।

४१औँ मिनेटमा जेम्सले गोल गरेपछि इङ्ल्यान्डले पहिलो हाफमा ३–० को सहज अग्रता लियो । ५७औँ मिनेटमा सुआङले पेनाल्टीमार्फत गोल गर्दै खेललाई ३–१ को स्थितिमा ल्याइन् ।

६५औँ मिनेटमा जेम्सले ब्यक्तिगत दोस्रो तथा टोलीका लागि चौथो गोल गरिन् । ७७औँ मिनेटमा केलीको गोलमार्फत इङ्ल्यान्ड ५–१ ले अगाडि बढ्यो । ८४औँ मिनेटान डेलीले गोल गर्दै इङ्ल्यान्डलाई ६–१ को सहज जित दिलाइन् ।

योसँगै शतप्रतिशत जितसहित समूह 'डी' को विजेता बनेको इङ्ल्यान्डले तीन खेलबाट नौ अंक जोड्यो । समान खेलबाट तीन अंक जोडेको चीन भने तेस्रो स्थानमा रहदै प्रतियोगिताबाट बाहिरिएको छ ।

मंगलबार नै पर्थ रेक्ट्याङ्गुलर रंगशालामा भएको खेलमा हाइटीविरुद्ध २–० को जित निकाल्दै डेनमार्कले पनि समूह उपविजेताको रूपमा प्रि–क्वार्टरफाइनलमा स्थान सुनिश्चित गर्‍यो ।

डेनमार्कलाई जित दिलाउन पेर्निल हार्डर र साने निल्सनले समान एक गोल गरे । खेलको १०औँ मिनेटमा हार्डको पेनाल्टी गोलमार्फत अग्रता लिएको थियो । इन्जुरी समयमा निल्सनले गोल गर्दै टोलीलाई २(० को जित दिलाइन् ।

जितसँगै तीन खेलमा ६ अंक जोडेको डेनमार्क उपविजेता बनेको हो । तीनै खेलमा हार बेहोरेको हाइटी अंकविहीन बन्दै प्रतियोगिताबाट बाहिरियो ।

अब क्वार्टरफाइनल प्रवेशका इङ्ल्यान्डले नाइजेरिया र डेनमार्कले आयोजक अस्ट्रेलियाको सामना गर्नेछन् ।