काठमाडौं । नेकपा (माओवादी केन्द्र)का सांसद माधव सापकोटाले निर्माण व्यवसायी गरेको आन्दोलनमा आफ्नो पूर्ण समर्थन रहेको बताएका छन् । मंगलबार सिंहदरबारमा बसेको प्रतिनिधिसभाअन्तर्गतको पूर्वाधार विकास समितिको बैठकमा उनले यस्तो बताएका हुन् ।

ठेक्का लागिसकेपछि ‘रनिङ बिल’मा समेत निर्माण व्यवसायीले भुक्तानी नपाएको भन्दै उनले सरकारको ध्यानाकर्षण गराए । केही दिनपछि अरनिको राजमार्ग ठप्प पार्ने गरी आन्दोलन हुन लागेको र आफू पनि त्यसमा सहभागी बन्न सक्ने उनको भनाइ छ ।

आन्दोलनकारीका माग जायज भएकाले हड्तालमा गएर सडकमा बस्नुपर्ने स्थिति रहेको उनले बताए । सांसद सापकोटाले चालु रहेका आयोजनाकै भुक्तानी गर्न नसकिए नयाँ योजनाको कुरा गर्नु बेकार हुने पनि बताए ।

“निर्माण व्यवसायीहरू अहिले पनि हड्तालमा हुनुहुन्छ, प्रधानमन्त्री निवासअगाडि । म त्यो आन्दोलनप्रति समर्थन गर्न चाहन्छु । मेरै निर्वाचन क्षेत्रमा पनि ५÷६ वटा यस्ता परियोजनाहरू छन्, जो ठेक्का भएर चालु रहेका रनिङ बिलमा समेत कन्ट्याक्टरहरूले पेमेन्ट पाएका छैनन् । यो प्रधानमन्त्री, अर्थमन्त्रीको समेत ध्यानाकर्षणको विषय हो । विषयगत मन्त्रालय हुनुको नाताले यी विषय हल गर्नुपर्छ । केही दिनपछि त अरनिको राजमार्ग समेत ठप्प पार्ने गरी चुनौतीहरू आएका छन्,” उनले भने, “आन्दोलनकारीका जायज माग भएकाले हड्तालमा गएर सडकमा बस्नुपर्ने स्थिति छ । यो सामान्य प्रकारको समस्या होइन । यी समस्याको समाधान हुनुपर्छ । चालु रहेका प्रोजेक्टहरूकै पेमेन्ट गर्न सक्दैनौँ भने नयाँ प्रोजेक्टको हामी किन धेरै कुरा गर्ने ? यो त कम्प्लिट हुनुपर्छ । अहिले ठेक्का लगाउँदा झनै जनताले बढी दुःख पाउने परिस्थिति भएको छ । नयाँ बजेट परिचालनको संघारमा छौँ, यसपालिको कसरी अर्थतन्त्र चल्छ मलाई थाहा छैन । किनभने, एकै ठाउँमा अर्बौँ रुपैयाँ र अर्को ठाउँमा १० लाख छ ।”