काठमाडौं । नेपाली राष्ट्रिय क्रिकेट टिमका अलराउन्डर दीपेन्द्र सिंह ऐरीको टिम मोन्ट्रियल टाइगर्सले क्यानडामा जारी ग्लोबल टी-२० मा पहिलो हार बेहोरेको छ । बिहीबार बिहान सम्पन्न खेलमा ब्राम्पटन वुल्भ्सले मोन्ट्रियललाई १५ रनले पराजित गरेको हो ।

ब्राम्पटनले प्रस्तुत गरेको १४४ रनको लक्ष्य पछ्याउने क्रममा मोन्ट्रियलले १९.१ ओभरमा सबै विकेट गुमाएर १२८ रन मात्र बनाउन सक्यो । 

मोन्ट्रियलका दीपेन्द्रले २४ बलमा दुई चौकाको मद्दतमा २८ रन बनाए पनि टिमको हार टार्न सकेनन् ।

सकिब अल हसनले २८, दिलप्रीत सिंहले २४ र शेर्फेन रदरफोर्डले १० रन जोडे । अन्य ब्याटरले भने दोहोरो अंकमा रन जोड्न सकेनन् । ​

वुल्भ्सका लोगानभान विकले तीन विकेट लिए । कोलिन डी ग्रान्डहोम र शहीद अहमदजाइले समान दुई विकेट लिए ।

यसअघि ब्राम्पटनमा टस हारेर ब्याटिङको निम्तो पाएको वुल्भ्सले १९.५ ओभरमा सबै विकेट गुमाएर १४३ रनको योगफल तयार पारेको थियो । 

ब्राम्पटनका कोलिन डी ग्रान्डहोमले ५६ रन बनाए । ग्रान्डहोमले ४० बलमा सात चौका र एक छक्का प्रहार गरे । उस्मान खानले ३३ र मार्क च्यापम्यानले २१ रन बनाए ।

मोन्ट्रियलका आयन अफजल खान, कार्लोस ब्रार्थवेटले समान चार विकेट लिए । अब्बास अफ्रिदी र सकिब अल हसनले एक-एक विकेट लिए ।

मोन्ट्रियलबाट दुई ओभर बलिङ गरेका दीपेन्द्रले २० रन खर्चिदा विकेटविहीन रहे ।

जितसँगै चार खेलमा सात अंक जोडेको वुल्भ्स शीर्ष स्थानमा उक्लिएको छ । पहिलो हार बेहोरेको मोन्ट्रियल समान खेलबाट ६ अंकसहित दोस्रो स्थानमा झरेको छ ।