बारा । भारतको बिहार प्रान्त पूर्वी चम्पारण ग्राम पञ्चायत पकडी–१४ थाना ढाका रुपौलिया बस्ने २६ वर्षीय मोहमद अमानुल्लाहलाई प्रहरीले पक्राउ गरेको छ । उनलाई आफ्नै श्रीमती २३ वर्षीया यास्मिन खातुनको हत्या गरेको अभियोगमा प्रहरीले बुधबार बिहान पक्राउ गरेको हो ।

यास्मिन सिम्रौनगढ नगरपालिका–६ बयलहट्टी बजारस्थित माइतीघरमा बस्दै आएकी थिइन् । अमानुल्लाहले ससुराली घरमा आएर धारिलो हतियार प्रयोग गरी यास्मिनको हत्या गरेको प्रहरीले जनाएको छ ।

हत्याको खबर प्राप्त हुनासाथ इलाका प्रहरी कार्यालय सिमरौनगढबाट खटिएको प्रहरीले उनलाई पक्राउ गरेको हो । अमानुल्लाहलाई स्थानीयले कुटपिट गर्दा घाइते भएकोमा उनको प्रहरीको निगरानीमा जिल्ला अस्पताल कलैयामा उपचार भइरहेको छ ।

घटनाका सम्बन्धमा प्रहरीले थप अनुसन्धान गरिरहेको जनाएको छ ।