काठमाडौं । पेरिस सेन्ट–जर्मन (पीएसजी)माथि फरवार्ड काइलियन एमबाप्पेलाई प्रि–सिजन एसिया भ्रमणबाट बाहिर निकालेर ‘नैतिक उत्पीडन’ गरेको आरोप लागेको छ ।

पीएसजीले एमबाप्पेमाथि नैतिक शोषण गरेको भन्दै फ्रान्सेली फुटबलर युनियनले क्लबविरुद्ध कानुनी कारबाहीमा जान सक्ने चेतावनी दिएको छ ।

पीएसजीका सर्वकालीन उच्च गोलकर्ता एमबाप्पे र क्लबबीचको सम्झौता समाप्त हुन एक वर्ष बाँकी छ । पीएसजी एमबाप्पेलाई सम्झौता समाप्त हुनुअगावै बेच्न चाहन्छ । एमबाप्पे भने सम्झौता समाप्त नहुँदासम्म पीएसजीमै बस्न चाहन्छन् । यसैकारण पछिल्लो समय क्लब र एमबाप्पेबीचको सम्बन्ध चिसिँदै गएको छ ।

पीएसजीले सन् २०१७ मा एमबाप्पेलाई १६५.७ मिलियन पाउन्डमा अनुबन्ध गरेको थियो ।

एसिया भ्रमणअन्तर्गत जापान र दक्षिण कोरियामा मैत्रीपूर्ण फुटबलका लागि निस्किएको पीएसजीले एमबाप्पेलाई टिमबाहिरै राख्यो । त्यसपछि युनियनले एक विज्ञप्ति जारी गर्दै क्लबले सबैलाई समान व्यवहार गर्नुपर्नेमा जोड दिएको हो ।

“सबै खेलाडीले अन्य खेलाडीको जस्तै समान रूपमा आफ्नो कार्यमा रमाउन पाउनुपर्छ । प्रशिक्षकले खेलाडीलाई काम गर्ने वातावरण बिगार्ने परिस्थितिको निर्माण गरेर कुनै कुरा स्वीकार गर्न लगाउनु वा छोड्न बाध्य बनाउनु नैतिक शोषण हो । यसलाई फ्रान्सेली कानुनले कडा रूपमा निन्दा गर्दछ ।  यस्तो व्यवहार गर्ने कुनै पनि क्लबविरुद्ध नागरिक र फौजदारी कारबाही गर्ने अधिकार युनियनसँग सुरक्षित छ,” जारी विज्ञप्तिमा उल्लेख छ ।

एमबाप्पे पीएसजीका लागि पछिल्लो ६ वर्षयता मुख्य खेलाडी बनेका छन् । उनी पछिल्लो पाँच सिजनयता लिग वानको उच्च गोलकर्ता समेत हुन् । एमबाप्पेले पीएसजीका लागि २६० खेलमा २१२ गोल गरिसकेका छन् ।

एमबाप्पेले सम्झौता नवीकरण अस्वीकार गरेपछि पीएसजीले उनलाई टिमका लागि खेल्ने समूहको सदस्य नै नमान्ने बीबीसीले खुलाएको छ । क्लबका अध्यक्ष नासेर अल–खेलाइफीले सन् २०२४ मा एमबाप्पेलाई ‘फ्री एजेन्ट’का रूपमा छोड्न असम्भव रहेको प्रतिक्रिया दिइसकेका छन् ।

पीएसजीले हालै मात्र क्रिस्टोफर गाल्टियरको स्थानमा बार्सिलोना तथा स्पेनका पूर्वप्रशिक्षक लुइस एनरिकेलाई मुख्य प्रशिक्षकको जिम्मेवारी सुम्पिएको छ ।