काठमाडौं । काठमाडौं र ललितपुरमा भएका सवारी दुर्घटनामा तीनजनाको मृत्यु भएको छ ।

ललितपुरको हात्तीवनमा बा३ख ४१०८ नम्बरको बसले बा५६प ३४५२ नम्बरको मोटरसाइकललाई ठक्कर दिँदा मोटरसाइकलमा सवार दुईजनाको मृत्यु भएको छ । मृत्यु हुनेमा काभ्रे घर भई हरिसिद्धिमा बस्दै आएका मोटसाइकल चालक ३१ वर्षीय जीवन तामाङ र मकवानपुरका २९ वर्षीय मानबहादुर वाइवा रहेका ललितपुरका प्रहरी उपरीक्षक नवराज कार्कीले जानकारी दिए ।

आज भएको उक्त दुर्घटनामा उनीहरू गम्भीर घाइते भएका थिए । बीएन्डबी अस्पतालमा उपचारका क्रममा उनीहरूको मृत्यु भएको ललितपुर प्रहरीले जानकारी दिएको छ । बसका चालक र सहचालकलाई प्रहरीले नियन्त्रणमा लिएको छ ।

यस्तै, काठमाडौं महानगरपालिका–३१, शान्तिनगरस्थित सडकमा बा१ह ३८८४ नम्बरको टेम्पोको ठक्करबाट पैदलयात्री मकवानपुरको थाहा नगरपालिका–१ घर भई काठमाडौंको शान्तिनगरमा बस्दै आएका ३८ वर्षीय रामभक्त श्रेष्ठको मृत्यु भएको छ ।

हिजो साँझ भएको उक्त दुर्घटनामा उनी गम्भीर घाइते भएका थिए । सिभिल अस्पताल हुँदै बीएन्डबी अस्पतालमा थप उपचारका क्रममा उनको मृत्यु भएको हो ।

टेम्पोको ठक्करबाट घाइते भएका अरू दुई पैदलयात्रीमध्ये एकजनाको केएमसी अस्पताल सिनामंगल र एकजनाको सिभिल अस्पताल बानेश्वरमा उपचार भइरहेको छ । टेम्पो चालकलाई प्रहरीले नियन्त्रणमा लिएको छ । रासस