काठमाडौं । त्रिभुवन अन्तर्राष्ट्रिय विमानस्थल भन्सार कार्यालय हुँदै भित्र्याइएको ठूलो परिमाणको सुन बुधबार बरामद गरियो । राजस्व अनुसन्धान विभागको टोलीले सो सुन बरामद गरेको थियो । विमानस्थलको भन्सार जाँचपास भएर ट्याक्सीमा लैजान लागिएको अवस्थामा सुन बरामद गरिएको थियो । सो प्रकरणमा हालसम्म ६ जना पक्राउ परेका छन् ।

मोटरसाइकल र स्कुटरको ‘ब्रेक सु’मा राखेर सुन भित्र्याइँदा डिउटीमा भन्सार अधिकृत सन्तोष चन्द थिए । उनीसँगै जाँचकीका रूपमा खरिदार कुमार ढकाल डिउटीमा थिए । डिउटीमा भए/गरेका कामको जाँचपास गर्नेमा भने प्रमुख भन्सार अधिकृत एवं उपसचिव श्रीराम टण्डन थिए ।

यस्तै, एक्सरे टेक्निसियनमा सरोज श्रेष्ठ रहेको स्रोतले जानकारी दिएको छ ।

स्रोतका अनुसार उपसचिव टण्डन भन्सार कार्यालयमा हालै आएका नयाँ कर्मचारी हुन् । उनले भन्सार अधिकृत चन्द र जाँचकी ढकालले गरेका कामको अन्तिम स्वीकृति दिएका थिए ।

• सुन जाँचपास गर्ने थिए ‘नयाँ भन्सार अधिकृत’

“श्रीराम टण्डन सर उपसचिव लेबलको प्रमुख भन्सार अधिकृत हो । उहाँ भरखरै आउनुभएको हो । तर, उपसचिव लेबलको कर्मचारीले प्याकेट खोलेर चेक गर्न सक्ने अवस्था हुन सक्दैन,” स्रोतले बाह्रखरीसित भन्यो, “मुख्य जिम्मेवार जाँचकी हुन्छ । जाँचकीले पनि सामान खोलेर हेरेको सीसीटीभीमा देखिन्छ । के कारणले त्यस्तो हुन गयो भनेर अनुसन्धानबाट थाहा होला ।”

उक्त प्रकरणमा भन्सार विभागले बिहीबार अनुसन्धान शाखाका निर्देशक मानबहादुर पौडेलको नेतृत्वमा ६ सदस्यीय छानबिन समिति गठन गरेको छ । समितिले पाँच दिनभित्र अध्ययन गरेर प्रतिवेदन बुझाउनेछ ।

• विमानस्थलबाट सुन तस्करी प्रकरण : छानबिन समितिले पाँच दिनभित्र प्रतिवेदन बुझाउने 

छानबिन समितिले आजैदेखि काम सुरु गरिसकेको छ । समितिले त्रिभुवन अन्तर्राष्ट्रिय विमानस्थलस्थित कार्गो गोदामबाट बुधबार करिब १०० किलो सुन कसरी बाहिरियो भन्ने सम्बन्धमा छानबिन गर्नेछ ।

समितिले भन्सार विभागका महानिर्देशक शोभाकान्त पौडेललाई प्रतिवेदन बुझाउनेछ । त्यसपछि दोषी देखिएकालाई कारबाही प्रक्रिया अघि बढाइने विभागले जनाएको छ ।