काठमाडौं । अवैध रूपमा त्रिभुवन अन्तर्राष्ट्रिय विमानस्थलको भन्सारबाट सुन बाहिरिएको सम्बन्धमा छानबिन गर्न गठित भन्सार विभागको समितिले पाँच दिनभित्र प्रतिवेदन बुझाउने भएको छ ।

बिहीबार बिहान विभागका अनुसन्धान शाखाका निर्देशक मानबहादुर पौडेलको नेतृत्वमा ६ सदस्यीय छानबिन समिति गठन गरिएको हो । “छानबिन समितिलाई पाँच दिनभित्र प्रतिवेदन बुझाउन भनिएको छ,” भन्सार विभागका सूचना अधिकारी पुण्यविक्रम खड्काले बाह्रखरीसँग भने, ‘प्रतिवेदनमा आधारमा कारबाही अघि बढाइनेछ ।”

छानबिन समितिले आजैदेखि काम सुरु गरिसकेको उनले बताए । समितिले त्रिभुवन अन्तर्राष्ट्रिय विमानस्थलस्थित कार्गो गोदामबाट बुधबार करिब १०० किलो सुन कसरी बाहिरियो भन्ने सम्बन्धमा छानबिन गर्नेछ ।

“समितिले कार्गो गोदामबाट सुन बाहिरिएको समयमा भन्सार प्रक्रियामा को–को सहभागी थिए, उनीहरूले प्रक्रिया पूरा गरे कि गरेनन्, अन्य व्यक्तिको संलग्नता छ वा छैन, कसरी सुन बाहिरियो भन्नेलगायत सम्बन्धमा छानबिन गर्नेछ,” खड्काले भने ।

समितिले भन्सार विभागका महानिर्देशक शोभाकान्त पौडेललाई प्रतिवेदन बुझाउनेछ । त्यसपछि दोषी देखिएकालाई कारबाही प्रक्रिया अघि बढाइने उनले बताए ।

राजस्व अनुसन्धान विभागको टोलीले सो सुन बरामद गरेको थियो । विमानस्थलको भन्सार जाँचपास भएर ट्याक्सीमा लैजान लागिएको अवस्थामा सुन बरामद गरिएको थियो । सो प्रकरणमा हालसम्म ६ जना पक्राउ परेका छन् ।