काठमाडौं । त्रिभुवन अन्तर्राष्ट्रिय विमानस्थल भन्सार कार्यालयबाट बुधबार ठूलो परिमाणमा सुन बाहिरियो । लगत्तै बरामद पनि गरियो । राजस्व अनुसन्धान विभागको टोलीले उक्त सुन बरामद गरेको थियो । विमानस्थलको भन्सार जाँचपास भएर ट्याक्सीमा लैजान लागिएको अवस्थामा सुन बरामद गरिएको थियो । सो प्रकरणमा हालसम्म ६ जना पक्राउ परेका छन् ।

उक्त दिन जाँचपासमा नयाँ भन्सार अधिकृत रहेको खुलेको छ । यस्तै, सो भन्सार कार्यालयका प्रमुख भन्सार प्रशासक अरुण पोखरेल बिदामा रहेको बताइएको छ ।

त्रिभुवन अन्तर्राष्ट्रिय विमानस्थल भन्सार कार्यालयका प्रवक्ता अम्बिकाप्रसाद खनालका अनुसार पोखरेल त्यो दिन बिदामा थिए । सधैँ बस्ने भन्सार अधिकृतभन्दा त्यो दिन नयाँ भन्सार अधिकृत रहेको प्रवक्ता खनालले बताए ।

“त्यो दिन नयाँ सर हुनुहुन्थ्यो । प्रमुख भन्सार अधिकृतले तल गएर हेर्ने कुरा हुँदैन, सेम्पल मगाएर हेर्ने हो । मुख्य हेर्ने भनेको चाहिँ जाँचकीले हो,” उनले बाह्रखरीसित भने, “कमजोरी कसको हो भनेर हामी अनुसन्धान गरिरहेका छौँ । दुई घण्टाभित्रमा हामीले अध्ययन पूरा गरेर प्रतिवेदन तयार पार्छौँ । भन्सार प्रशाक बिदामा हुनुहुन्थ्यो ।”

‘ब्रोक प्याड’ धेरै ‘सेन्सेटिभ’ होइन भनेर त्यसै छोडियो कि भन्ने अनुमान गरिएको उनले बताए ।

यस्तै, जाँच गर्ने मेसिनले काम नगरेको हो कि भनेर पनि अध्ययन भइरहेको उनले बताए । त्यसको डिटेल निकाल्ने काम भइरहेको खनालको भनाइ छ ।

अहिले त्यहाँको सीसीटीभी फुटेजलगायत अध्ययन गरी प्रतिवेदन तयार पार्ने काम भइरहेको उनले जानकारी दिए ।

अनुमानित १०० किलो सुन बरामद गरिएको हो । नेपाल राष्ट्र बैंकमा जोखेपछि सुनको यकिन तौल थाहा हुने राजस्व अनुसन्धान विभागले जनाएको छ ।

विभागका अनुसार हालसम्म उक्त घटनामा संलग्न ६ जनालाई पक्राउ गरिएको छ ।