काठमाडौं । नेपाल वायुसेवा निगम (नेपाल एयरलाइन्स)को मलेसिया–भैरहवा–काठमाडौं उडान ११ घण्टा ‘डिले’ भएको छ ।

नियमित उडान तालिकाअनुसार जहाज बिहान ५ बजे मलेसियाको क्वालालम्पुरबाट उडान भर्नुपर्ने थियो । तर, उडान भर्नुअघि उडान नम्बर आरए–४२२ रहेको निगमको नाइनएन–एकेडब्लू जहाजको नियमित इन्फेक्सन (निरीक्षण) गर्दा ‘क्रू अक्सिजन बोतल’को प्रेसर कम देखिएको थियो ।

नियमित उडान समयअनुसार जहाजले बिहान ८ बजे भैरहवास्थित गौतमबुद्ध अन्र्तराष्ट्रिय विमानस्थलमा अवतरण गर्नुपर्ने थियो । समयमा नै त्यसको जोहो गर्न नसक्दा जहाजले नियमित समयमा उडान गर्न सकेको थिएन ।

अहिले त्यसको व्यवस्था भइसकेको र उडानको तयारीमा रहेको निगमका प्रवक्ता रमेश पौडेलले बताए । जहाजले क्वालाम्पुरबाट नेपाली समयअनुसार ३ बजे उडान भर्ने प्रवक्ता पौडेलले बताए ।

उडान ढिलो भएकोमा निगमले यात्रुसँग क्षमा समेत मागेको छ । अहिले उक्त उडानमा रहेका यात्रुहरू विमानस्थलको प्रतिक्षालयमा छन् । उनीहरूको व्यवस्थापन नेपाल एयरलाइन्सले नै गर्नेछ ।

छानबिन समिति गठन

उक्त घटनाको विषयमा छानबिन गर्ने निगमले समिति गठन गरेको छ । के कस्तो कारणले यस्तो प्राविधिक समस्या आएको हो, सो को सत्यतथ्य पत्ता लगाउन छानबिन समिति गठन गरिएको निगमले जनाएको छ ।

समितिले भविष्यमा यस्तो समस्या हुन नदिन समेत सुझाव दिनेछ ।