विराटनगर । मदिरा सेवन गरी सुनसरीको सप्तकोसी नदीछेउमा युवती समूहबीच ‘ग्याङ फाइट’ भएको छ । घटनामा संलग्नमध्ये एकजनालाई पक्राउ गरी प्रहरीले अभद्र व्यवहारमा कारबाही अघि बढाएको छ ।

सुनसरीको बराहक्षेत्र नगरपालिका–९ स्थित सप्तकोसी नदी किनारमा युवतीबीच ‘ग्याङ फाइट’ भएको हो । पाँचजनाको समूहले अर्को समूहलाई निर्घात घुटपिट र आक्रमण गरेको थियो । जिल्ला प्रहरी कार्यालय सुनसरीले घटनामा संलग्नमध्ये एकजनालाई पक्राउ गरिएको जनाएको छ ।

कुटपिटमा संलग्न आरोपमा बराहक्षेत्रकी १९ वर्षीय कृति लिम्बू पक्राउ  परेकी छन् । सप्तकोसीको राजावास क्षेत्रमा यो घटना भएको सुनसरीका प्रहरी प्रवक्ता एवं डीएसपी राजकुमार राईले जानकारी दिए ।

कुटपिट गरी त्यसको भिडियो सामाजिक सञ्जालमा अपलोड गरिएको थियो । घटना गएको शुक्रबारको हो ।

प्रेमीको कुरा काटेको र त्यसकै आक्रोशमा मदिरा सेवन गरी कुटपिट गरिएको प्रारम्भिक अनुसन्धानका क्रममा खुलेको प्रहरीले जनाएको छ ।

घटनापछि फरार अरू चार युवतीको खोजी भइरहेको डीएसपी राईले बताए । घटनामा संलग्न दुवै समूहका युवती साथीहरू हुन् ।

केही महिनाअघि मोरङको मिक्लाजुङको एक सामुदायिक विद्यालयमा पनि पे्रमीकै विषयमा एउटा समूहले युवतीमाथि कुटपिट गरी त्यसको भिडियो सामाजिक सञ्जालमा पोस्ट गरेको थियो । त्यो घटनामा संलग्नलाई पक्राउ गरी मोरङ प्रहरीले मुद्दा चलाएको थियो ।